贏在起跑線是不少富二代的標籤，但到富三代就有點不一樣，因為富三代生活未必如外間想像般生活無憂，因為好多上一代會成立家族基金，每月「出糧」畀仔女，加上覺得已經有大屋有司機畀仔女住，大學畢業返嚟又有份穩定職業，應該足夠生活，比起時下年輕人已經好好多，同埋仔女唔搞事已經心安。
「阿胖」教仔女就係用呢種諗法，好似佢一對仔女咁，每個月有卡碌，去食肆可以簽單，點知阿胖發覺仔女不務正業，成日唔返工掛住玩，惟有忍心cut晒佢哋福利，以為可以用閂水喉令仔女就範。辣招一出，阿女即刻「生性」，開始勤力做下網紅工作，同幫品牌做嘢，都叫做有少少收入，但細仔就覺得阿爸唔會咁絕，試過一次佢帶咗一大班富二代去爸爸畀佢簽單嘅餐廳，佢就享盡兩邊福利，卡照簽又同時收返班朋友錢，幫補一下生活使費，點知阿胖真係好認真，已通知餐廳唔再幫呢對仔女找數，於是阿仔惟有碌卡，但發現已被cut卡，但佢唔敢打畀阿胖，最後仲索性走人，餐廳職員惟有諗盡方法先收得返呢條爛賬。
夜場同人打交
阿胖同朋友呻，阿仔原本係佢最錫嗰個，不過唔生性，阿胖最不滿就係請埋保鑣跟住個仔出入，點知阿仔就帶埋保鑣入夜場，仲同人打交，搞到差啲要報警，阿胖冇晒面子，最後阿仔因為冇錢使，阿媽又唔接濟，惟有死死氣返去𠱁返爸爸，成日陪阿胖出埠，就算阿胖帶埋女友去旅行，阿仔都貼身做乖仔，兩仔爺先和好如初。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
