「黑人抬棺舞」早前喺網絡爆紅，相信各位球迷見到呢幾位黑人着晒老西，合力抬住一副棺材嘅相，個腦已經響起熟悉嘅電子音樂。早排棺材舞隊長Benjamin Aidoo就話自己嘅偶像係巴塞隆拿嘅美斯，最近佢接受訪問就話，有機會嘅話最希望送「細哨」朗拿甸奴最後一程，仲話武漢肺炎搞到佢冇晒生意。我諗細哨聽到真係唔知有咩反應好，希望Benjamin生意好番，但唔係佢自己去享受服務啦。
抬棺舞致敬球場舞蹈家
來自非洲加納嘅Benjamin雖然係從事殯儀工作，但佢認為大家唔應該好傷心咁面對死亡，係應該去慶祝死者曾經嚟過呢個世界，所以先諗到「黑人抬棺舞」咁別出心裁嘅服務。當佢被問到最想為邊啲球星「服務」時，身為巴塞球迷嘅Benjamin就揀咗因為用假護照、目前被巴拉圭政府軟禁嘅前巴西球王朗拿甸奴：「我當然希望佢哋全部都長命百歲啦，但如果真係有機會，我希望送朗拿甸奴最後一程，之後就係馬勒當拿，最後係美斯。其實朗拿甸奴一直都係我好欣賞嘅球員，球場上嘅佢就好似舞蹈家，所以我好希望可以用舞蹈向佢致敬。」
武肺雖然令好多人喪生，但Benjamin就話疫情反而令佢冇晒生意：「隻舞的確令我哋爆紅，大家都話成個網絡都係我哋抬棺舞嘅片，亦有好多人想搵我哋做訪問。但係一場武肺搞到冇人搵我哋開工，冇工開即係冇收入，我哋呢段時間嘅生活都好難捱。不過只要等疫情過後，我同我嘅團隊就會去全球世界各地提供服務，希望唔同人都可以了解我哋點向死者致敬。」唔知到時會唔會有香港人幫襯？
講起「哨牙蘇」就爆seed
雖然Benjamin係巴塞同美斯球迷，但就講明好憎一位美斯喺巴塞嘅前線拍檔，佢係邊個？咪就係蘇亞雷斯囉！原因係呢位烏拉圭前鋒喺2010年世界盃對加納嘅8強戰，喺下半場補時階段「龍門上身」用手擋走對方嘅必入波，搞到加納最終喺互射12碼階段被淘汰。Benjamin話：「每次我見到蘇亞雷斯，甚至只係聽到佢個名，我都會覺得好唔順氣！因為佢嘅故意手球令加納入唔到四強，真可惡！我哋加納呢度有個講法，就係蘇亞雷斯代表『唔可能』，當想做一件事嘅時候，只要佢出現，咁就代表你永遠都唔會成功。」相信Benjamin同佢嘅團隊就唔會「服務」阿蘇喇。