今次武漢肺炎疫症，北京不論對內定對外都堅持叫「新冠肺炎」，一定唔可以同武漢或中國拉上任何關係，最多用英文「COVID-19」。不過毛孟靜噚日喺facebook開心share，話梁美芬喺佢派街坊嘅工作報告入面有一封「致九龍西居民的信」，竟然寫香港正受「武漢肺炎」疫情爆發影響。嘩，咁政治不正確嘅說話，當然惹來一班網友齊聲恥笑。
網民建議向兩辦投訴
有人就提議將鼠王芬亂港言論貼去藍絲討論區，等一班同路人點醒佢個腦。有人更絕，建議將工作報告寄去中聯辦同港澳辦，等兩辦「肯定」佢嘅工作。可能擔心事件發酵到國家層次，鼠王芬傍晚喺fb回應，話工作報告係1月底2月初印刷，當時世衞仲未對病毒正式命名咁話，已經喺新印嘅報告改返做「新冠肺炎」。八方覺得鼠王芬嘅解釋幾牽強，皆因世衞2015年已經話病毒命名原則要避免令國群體或國家污名化。到底係鼠王芬係唔熟書，抑或其實覺得「武漢肺炎」通俗易明、地區選民會受落啲？八方就不作猜測嘞。
李八方