不少巿民見疫情開始穩定，趁着前日母親節，都一家外出行街食飯慶祝，晚上旺角卻發生多輪警民衝突，防暴警用胡椒噴霧驅散巿民和傳媒，更推跌並拘捕調停的立法會議員鄺俊宇，警方前日濫捕約200名少年男女，包括12歲的學生記者。黃秋生、梁芷珊及杜汶澤等紛紛在社交網鬧爆警方濫暴。
影帝黃秋生昨早在fb連續數臭警方惡行：「打女人，恰細路，性騷擾，販賣毒品，欺凌弱智、殘疾、露宿者、老人家。」他又指如果沒有這些「敗類」社會會更和諧：「咁仲可以當自己係正義之師，加埋精神異常，呢個社會冇咗呢種敗類會和諧好多。」截至昨晚已有近千留言支持秋生，網民一同鬧爆警察：「根本就是這些敗類，令到香港社會不安寧。」
梁芷珊寸林鄭
才女梁芷珊昨日凌晨也在社交網，寸爆特首林鄭月娥在前日母親節的帖文：「『祝各位媽媽有個溫馨愉快的母親節』？口裏說祝福，鍵盤賣溫情，手下是暴行，腳下是膝壓。母親節晚上，她睡得着嗎？我打賭，她是會睡得着的，但香港人不。」她又引孟子的《論四端》，明寸林鄭毫無惻隱、羞惡、辭讓、是非之心。《頭條新聞》主持曾志豪看到12歲學生記者被捕，獲釋受訪時，情緒激動向媽咪致歉後，他在fb大讚：「12歲的勇敢，全副武裝的他們顯得膽怯和卑劣，你毋須說對不起，該說對不起是我們。」
「黑警屠殺港人」
阮民安（Tommy）前晚更約埋守護孩子成員「陳伯」陳基裘一齊去旺角行街，Tommy昨早再在fb指前晚是「血色母親節，8.31翻版」，並連數警方前晚在旺角的惡行，直言：「軍政府唔只係戒嚴，直情係授權黑警屠殺香港人。母親節已經唔敢求快樂，原來要平安都咁難！我哋唔會忘記，一定會常存憤怒。」何韻詩就轉貼相關新聞報道留言：「由上年到今日，香港人每一個節日都不得安寧。封晒全港九新界，以後都唔好畀人出街同慶祝啦，咁驚市民。」
杜汶澤也大罵警方：「毒警好興問細路仔，有冇諗過自己前途，睇嚟佢哋以為自己份X工，好X有前途頂嘞。」阿澤昨早再用港女mode揶揄：「唔制呀，人哋咁細膽邊敢撈冰喎！我好嬲呀，我要拉你呀！」邵仲衡前日亦在fb斥警察濫捕：「稚子何辜，青年何辜，長者何辜，婦孺何辜，遭此荼毒？」他更表示聯合國《兒童權利公約》有保障18歲以下人士的基本權利。
撰文：南瓜
