【黑鏡線索】
中国病毒輸出全球，各地公司好多轉咗暫時work from home，Google表示，預計公司會一直實行work from home到下年。
咁嘅形勢，其中一類生意急升嘅公司，就係做商用監控嘅軟件。
之前講過，remote work對管理層最大挑戰，係忽然間冇咗平時in control嘅感覺。公司一般好關心量度同事每日返工返咗幾多時間，因為好多時量度inputs容易過量度outputs，而inputs裏面最容易量度嘅，就係時間。
我以前做過一間科網公司，規定同事返工放工要打卡，係真係有張卡插落部機「叮」一聲咁打卡，然後有HR同事，負責每星期手動將每張卡上嘅時間，入落Excel，加起佢，再交畀管理層。可以想像，管理層攞住一張張有晒數字plot晒chart嘅報表，管理會好到位，好數據，好科學。
量輸出有難度 用軟件度時間
當一間公司，無論係自願或被迫，要行remote work，咁就有三個選擇。第一個，係的起心肝，由inputs主導轉成outputs主導，當中牽涉嘅改變可以好大，而且需要一段時間適應同摸索，總會有push back，短期之內，效果隨時仲衰過以前。呢個係難度最高嘅選擇。
第二個選擇，係佛系管理，既唔量度inputs又唔量度outputs，呢個方法最輕鬆，但應該係最危險，其中一個問題，係同事之間開始會質疑，究竟其他人係咪喺度hea，咁如果係自己咁投入嚟做乜。
第三個選擇，係繼續量度時間，但係轉用另外一啲方法量度，例如用監控軟件。近排唔少管理人，可能都睇過類似嘅網上廣告：你點知你嘅同事喺屋企係咪真係做嘢？抑或喺度扮工其實睇YouTube上IG？我哋嘅監控軟件就幫到你！
疫症引監控 打乜字都知
有啲監控軟件，個包裝比較軟性，唔會定位做監控，而係複製出好似一齊喺公司嘅感覺，會叫你長期開住個cam，等大家都見到你，如果你一段時間電腦冇郁過，就會mark住idle，等大家可以放心問你問題或者搵你傾嘢。
有啲監控軟件，可以去到好盡。首先裝落同事嘅公司電腦度，之後同事喺電腦上嘅一舉一動，幾時去咗邊個網站，開咗邊個程式，打咗封乜嘢email，全部有晒紀錄，同埋定時定候會用部webcam影張相。
就算你用自己部電話睇片，電腦個webcam都會影到你望住電話，而且電腦又冇感應到你打字或者用mouse，即係扮工啦。有啲再絕啲嘅，係監察埋你打嘅字，如果有某啲字眼例如“job”，就會自動發出警示，懷疑你搵緊工。其實呢類軟件不嬲都有，但以前大家會覺得好creepy，疫情下嘅WFH，就畀到個理由去試。
暫時呢啲監控軟件未係主流，但個疫情越搞得耐，越多公司可能會試，而一旦開咗個頭，就可能好似中国咁，沉迷科技監控，享受做big brother嘅變態快感。當然，工可以轉，但係香港，就只可以靠光復自救。
撰文：宋漢生
fb : sunghsblog