英國傳媒報道，上海申花將要求目前外借到曼聯嘅前鋒恩哈路如期喺七月歸隊，為中超新球季作準備。季中加盟曼聯嘅恩哈路，上陣8場攻入4球表現出色，但受疫情影響英超自三月中開始一直停擺，但佢嘅借用合約喺今年六月就屆滿，意味佢可能無法再為紅魔上陣。如果曼聯要留用呢位尼日利亞前鋒，買斷價係2,000萬鎊（約1.9億港元），佢上月接受傳媒訪問就話曼聯仲未同佢傾，但領隊蘇斯克查就暗示過希望佢留低，據報紐卡素亦有意加入戰團。不過早前有報道指申花已開出40萬鎊（約385萬港元）周薪嘅條件，要求延長合約至2024年底，對下個月就31歲嘅佢嚟講，呢個人工真係好難抗拒。