自詡「香港母親」嘅777，應該成為母親節全港俾最多人問候嘅媽媽。佢本來想趁節日喺fb貼長輩圖晒禮物呃like，但佢係都要抽水，話「手足波」林兆波同佢兩個唔喺香港嘅仔，趁母親節送咗個驚喜畀777，但份禮物就搵個大紙盒裝住再快遞去禮賓府，結果成件事變咗一單「炸彈郵包」疑雲，俾網民笑足兩日，仲有網民發現呢單嘢有疑點喎！
被恥笑有反社會人格
其實成件事好簡單，但777喺po寫到負責保安嘅Popo對件包裹好有戒心，又話PK鄧都收到有爆炸裝置嘅郵件，過去一年禮賓府有五次收到放炸彈虛報，要手足波及時通知Popo先冇勞師動眾。但問題就嚟，有網民話照計手足波喺香港，為乜份禮唔由手足波接收，再代兩個仔交畀777呢？唔通手足波平日都冇見777？
仲有，777喺po一邊讚份禮物有心思，話同佢用開嘅公事包同牌子同型號，一邊又彈三彈四，又話顏色唔同，話橙色唔係佢至愛，莫非佢同兩個仔加老公平日根本冇乜溝通？更令網民恥笑嘅係，留言寸佢「平生不做虧心事，半夜敲門也不驚」、「收禮物都要怕，好人有限」，有網民亦留話「喺新屋嶺班小朋友嘅母親面前，你配唔上慶祝母親節」，仲有網民覺得777咁都講得出，係幾咁悲哀，「點想像到香港幾十年嚟由港督走到特首，會驚自己個仔寄嚟嘅禮物會係炸彈？作為千古罪人嘅你，仲竟然覺得好溫馨！果然係反社會人格」 。
李八方
