近日全城熱話梗係54歲嘅郭富城，喺室外超過30度高溫下又唱又跳喇！其實城城除咗跳得之外，拍戲都唔錯架，話說城城最新嘅一部電影《麥路人》，仲獲提名今屆金像獎嘅最佳男主角，但同體育版有乜關係？事緣比城城後生26年嘅丹麥中場基斯甸艾歷臣，近日自爆喺一月從英超轉戰意大利之後，趕唔切搵屋就遇上武漢肺炎爆發，搞到好似《麥路人》嘅城城咁無家可歸，唔單止要喺球會停車場練跑，仲焗住要瞓訓練中心，去超市行街都畀警察趕，完全解釋到人離鄉賤嘅苦況呀！
唔想搞「住」國際隊友
話說電影《麥路人》係講緊一班無家可歸、要喺老麥寄宿嘅「麥難民」，由城城飾演嘅男主角仲曾經係金融才俊！雖然套戲上年聖誕上咗幾日，但趕及金像獎提名之後，因為疫情到家陣都未正式上影，不過遠在意大利有位球壇名將就同樣受疫情影響，經歷過無家可歸嘅情況。
講緊嘅就係丹麥中場艾歷臣，呢位前英超熱刺中場，今年1月先以2,000萬歐元轉投意甲國際米蘭，踢咗8場波入1球，點知武肺無啦啦喺意大利爆發，意甲停擺外米蘭仲要封城，令艾歷臣搵唔切地方落腳，搞到無家可歸，仲有諗過搵同樣踢過英超嘅現役隊友幫手：「我有諗過同盧卡古或者艾舒利楊格傾吓，借張梳化嚟瞓，但佢哋都有屋企人要照顧，始終有個陌生人嚟瞓梳化，仲要瞓14日咁長等封城令完，就實在太耐喇！」
冇得操要跑停車場
結果艾歷臣最終決定，同球會內嘅5名工作人員仲有1名廚師，留喺國際嘅訓練中心住，但其他人之所以唔返屋企，係因為驚自己會傳染病毒畀屋企人先留喺米蘭，同艾歷臣身不由己唔同。艾歷臣仲話，自己喺米蘭實施封城令期間，打算出街買嘢嗰陣畀警察趕：「當時有警察攔住我，問我做乜喺條街行，結果我要用好差嘅意大利文解釋。」似乎艾歷臣今次嘅轉會比起其他球員更難適應喎！
除咗生活不便，作為職業球員嘅艾歷臣仲要面對日常訓練嘅問題：「我哋要跟球會發出嘅訓練時間表同飲食計劃，作為職業球員一定要遵守。由於訓練中心嘅球場關閉，我一直喺地下停車場練跑，我已經七個星期冇掂過個波，呢段時間係我一生中最長時間冇接觸過足球，我開始掛住足球喇！」隨住意大利疫情開始緩和，意甲各隊都陸續恢復個人訓練，希望艾歷臣好快可以好似城城咁喺電視上為大家獻技！