由一班政治廢老牽頭成立嘅香港再出發大聯盟，首主題曲《再出發》侵犯版權偷片剪輯入自己條MV在先，最後樣衰地被迫喺YouTube下架，大聯盟唔知係咪條氣唔順，竟然走去學佢哋大力批評嘅「攬炒」，受害人正是高登音樂台。
話說自從首維穩歌《再出發》首播後，高登音樂台就二創咗《再出殯》，仲為咗唔好俾人話侵權，所以重新編曲同譜新詞，但都係敵唔過疑似大聯盟惡意投訴，唔單止《再出殯》要下架，連成個音樂台都俾YouTube摺埋。高登音樂台成員之一「漏奶leakmilkhkg」噚日宣佈呢個消息，狠斥大聯盟「連少少創意都容不下」，音樂台亦喺fb出文，對強權同YouTube打壓二創自由深表憤怒。不過高登仔已講明有打不死精神，會用盡方法將大家嘅聲音傳達。