龍之隊又有新希望喇！喺「中國香港」出世，同時有英國護照嘅戴偉浚，傳咗段時間話會「送中」，加盟本身應該降班、但可能有得留班嘅中超球隊深圳佳兆業。「小戴」佢果然喺深圳試緊腳，仲畀深圳隊助教馬達洛尼大讚，話佢有能力踢中國隊，呢位前國足助教話：「『俱樂部』辦緊手續喇，如果聯賽開打，佢又有表現，我會打畀李鐵（中國主教練），推薦『小戴』！」不過佢有冇代表中國嘅資格，其實都未搞清，但就算唔得，中國大不了釋法嘅箒，反正都做開，熟晒手啦！20歲嘅戴偉浚，11歲嘅時候移民英國，2017年喺英甲貝利出道，之後轉會牛津聯，上年再去到狼隊，嚟緊應該會喺中超見到佢，或者有機會同佢老友、踢廣州富力嘅陳俊樂交手。深圳隊上季喺中超排第15，即係尾二，本身要降班嘅，但天津天海可能解散，所以深圳話唔定有得留低。