【本報訊】昔日稱霸製衣採購的貿易中介人利豐（494），隨着互聯網及快速時裝顛覆行業生態，迫使其營運模式「洗牌」；管理層決定再次離開港股市場，進行「更深入重組」。十多年前曾與利豐合作的香港製衣廠琪樂時裝銷售總監李澤林（Tommy）認為，利豐生意規模萎縮，是集團之過，也是時代的「錯」。
指利豐團隊質素參差
利豐主要為歐美品牌協調與內地及其他國家廠家定單，琪樂時裝早於2004年接觸利豐，物色主要生產褸、褲、裙等梭織物供應商；Tommy憶述合作近六年，經利豐得到五至七個來自加拿大、美國、澳洲等品牌的定單。
不過，Tommy發覺利豐「跟單」小隊之間的質素甚至操守相當參差，「同我講嘅時候就話呢啲cost你可以包埋，可以報出去，但到見客時就話呢啲cost你應該自己食」，事件亦不只發生在Tommy身上，「有時我同啲做廠嘅朋友交流時話，利豐有客喎，佢哋都會話，經利豐我唔做呀」。
惟Tommy同意利豐能做好客戶開發，在網絡未發達年代，依靠利豐解決言語不通問題；但隨着互聯網成熟、行業人員進步、利潤空間縮小等改變，貿易中介生存空間已越來越細，「自從Zara、H&M出咗，令產品價錢平咗，啲嘢靚咗又快咗，咁點可能存在中間仲有一個人？又加啲錢，跟住又拖吓時間」。大品牌有能力在內地建立採購辦公室，廠家亦會將資料放上網、擺展覽；琪樂時裝現時已再無跟任何貿易中介合作。
貿易中介雖然式微，但利豐未有放棄這門生意。宣佈私有化前，利豐重組團隊，組成採購及生產平台，打破團隊之間隔膜；由於客戶關係管理改善，客戶更替逐漸穩定。同時投資數碼化措施，包括3D虛擬設計、潮流引擎、3D產品開發技術等，計劃將廠商轉為新客戶群，為工廠提供可提升營運效率服務，揚言改革將為公司帶來年值數億元新業務。利豐轉型之路成功與否仍屬未知之數，但可以肯定改革之路遙遙。