【本報訊】特首林鄭月娥日前宣佈放寬限聚令，但夜總會、卡拉OK及派對房間卻不在「解禁」之列，全港60間夜總會要延長關閉至5月21日，引起業界不滿，但上周五食衞局宣佈准許多於一種持牌業務的夜總會重開，獲業界歡迎。大部份位於旺角的夜總會隨即陸續恢復營業，又指可提供餐飲服務，「只要唔唱卡拉OK就得。」
「你叫我哋開嚟做咩？」
不過，政府不准夜總會有「公關小姐」陪酒，又禁止在場內唱歌跳舞，昨凌晨警方更突擊查牌，有旺角區夜總會經理表示「冇PR坐枱，開嚟等於廢」，即拉閘抗議。
昨凌晨1時許，多名軍裝警員到油麻地南京街一間夜總會查牌，過程中未有出現混亂，警員逗留至凌晨約2時離開，其間未有發出告票，亦未有拘捕任何人。
港九舞廳夜總會聯合總商會理事長廖偉對事件感到憤怒，指警方向業界表示，夜總會可以賣酒，但不可以有人陪酒，亦不可唱卡拉OK，他指「我哋唔係酒吧嚟，唔係靠賣酒㗎，你叫我哋開嚟做咩？」。他指政府政策朝令夕改，「一時話開得，一時話唔開得」，令全行無所適從及憤怒，「政府真係好有問題囉，無了期押後咁你叫大家點呀？」