蘇志威在2011年開設的跳舞學校i Dance，早前被投訴尖沙嘴分校停業兼炒員工沒賠償，當時蘇志威表示炒人是正常兼有賠足。不過昨日《蘋果》再收到讀者投訴，指學校聲稱為配合政府「限聚令」，將轉為7人的小班課堂，會員選擇這個課堂，將被扣除兩堂費用，被懷疑有濫收學費之嫌，投訴人更聲稱有導師曾向學員透露，公司未有支付薪金，大罵股東蘇志威和韓馬利是無良商人。
「政府補貼唔公平」
據學校的fb專頁，報名本月21日前的7人課堂需扣除兩堂費用，而會員的已購課程將獲得延期14天，會員亦可辦理取消課堂預約和退錢手續。蘇志威昨日接受《蘋果》電話訪問，他表示根據政府現時的指引，每個課堂可以有7名會員跳舞，他說：「3,000呎課室得7個人，其實蝕錢蝕得好緊要，CEO話如果收兩堂收費用3,000呎房，我哋可以接受，所以我畀學員有呢個選擇。」他指學員沒有任何損失，並透露受限聚令影響，連月來已損失超過400萬元，「42日冇開，租金同員工係300幾萬，但政府只係補貼咗50萬，呢個其實係好唔公平嘅補償，我公司損失好慘重，一間美容院、小型舞蹈學校，五個員工每個有8萬，𠵱家我公司係80人，賠得50萬，呢個好慘！政府話同業界傾過，究竟佢同業界邊啲有名望嘅人去傾？我好懷疑，如果我哋唔係龍頭，唔係同我傾，你同邊個傾，食環究竟諮詢過邊個？」
否認拖老師薪金
對於網民的投訴，蘇志威坦言不排除有些人不是學員，有可能是其他競爭對手，他表示：「有啲可能係學員嬲，政府政制令我朝令夕改，所以將憤怒轉嫁i Dance身上，其實我係根據政府指引做決定，我都係夾喺中間。學員請記住，限聚令係非常時期，𠵱家開小班係畀限聚令下都好想跳舞嘅人，大家共同度過，我寧願蝕都做。」至於被批評是無良商人，蘇志威表示很無奈，指自己沒有做違反良心的事，並反問：「有人話我冇出糧，黑心老闆，想問我冇出畀邊個？我從來冇做過呢樣嘢，如果有，點解唔去勞工處告我？」
採訪：皓騫