限你八秒作答：港基究竟生成點嘅樣？廿零三十歲，灣仔銅鑼灣返工，從事與美藝有關行業，譬如髮型屋洗頭仔，或者時尚服飾店售貨員，追韓劇，養貓，飲NOC咖啡，有拖拍睇法國片，冇拖拍遠離戲院，中意扮靚，中意去曼谷，中意食自助餐，一星期至少健身五次，不論藍黃，上街遊行示威必定同時勾佬，眼耳口鼻如果唔似張國榮，都有少少古天樂風味……噢，恭喜你，全中！我那些散佈港九新界的同志朋友，幾乎有一半符合以上形容，但是請勿尖叫，另一半你就完全估佢哋唔到──年近花甲甚至已屆古稀，住牛池灣或汀九，好日唔出尖沙咀，遑論過海去中環，成世人未做過facial，腰圍至少三十七，後生嗰陣酒樓做廚房，如今絕不碰砧板，夏日炎炎歎火鍋，秋涼食蛇羹，平日熱衷打四圈，點唔得閒每隔一頭半個月都雄心勃勃上深圳消遣，悉心打扮遠望似素顏劉德華，否則就十足十燒山咁款。兩組人唯一共同嗜好，是成群結隊包房唱K。
所以不論拍得如何，《叔．叔》都不可不看，尤其上世紀已遭英國耽美電視劇《故園風雨後》毒害的優雅中產，是時候醒一醒了。市面充斥的基族，除了花枝招展的青春少艾，還有面目模糊的路人甲，心中那座斷背山攀爬者龍蛇混雜，誰都毋庸申請通行證。早年電影裏的同志，幾乎無一例外悲劇收場，石牆運動後邁進男兒當自強境界又有點矯枉過正，鋪出的康莊大道往往只通小資美學園地，弱肉強食蔚為生活指標，小眾中的小眾全部被排斥在外。踏入二十一世紀轉眼二十年，是時候擁抱新秩序了。