同心抗疫底褲，官稱重用口罩，設計幾啱老董。老董在記招中上氣唔接下氣，心神恍惚，戴住口罩想飲水，隨時未出發已濕身。口罩有六層，抗菌次要，至緊要索，強效過老人紙尿褲。林奠知老董心事，已預留N個送給再出發、嗰頭近的老坑團友，唔使搶廁紙或紙尿片，由口鼻到肛門都照顧好，安心出發。
豪擲庫房三四億的六層口罩加濾芯，超厚，防範各區受到法院判詞激活的高尚情操牛肉刀，雖然不是ASTM認證，無日內瓦金獎，斷估都能擋得兩下。林奠管治權已經丟得七七八八，西環駱主任好快會搵佢照肺。口罩適時派上用場，口罩代奶罩，移位遮肺，林奠唔係聶公，搵罩保肺，唔會手震。
口罩交叉紙尿褲神設計，睇到立法會保安員戴住黑手套當刻的模樣，令人相信保安真心想保住自己份工，萬一泛民突圍，嚇親未來市長李慧琼，保安揹鑊，一褲都係。黑手套配搭埋底褲罩，雙重保險，狙擊泛民，免後顧之憂。呢份工招聘對象，是與凌虐露宿者的九警有同一鋪癮的同袍，condom功能已廢，轉型做同心底罩啦，收到冇？