祖雲達斯球星基斯坦奴朗拿度（C朗）上周六喺社交媒體分享咗七個鍛煉動作，教粉絲喺武漢肺炎疫情期間在家健身，同時啟動同連鎖健身公司Crunch嘅合作夥伴關係。C朗上周一已經由家鄉馬德拉島返咗意大利，目前佢仲隔離緊所以未返得去球會操練。不過C朗冇因為咁而偷懶，佢仲透過CR7 Crunch Fitness發佈有七個動作嘅「新健身概念」影片，宣佈佢喺球場外嘅最新計劃，希望幫球迷保持狀態。C朗最初喺2017年同總部喺美國嘅Crunch合作，喺馬德里嘅Cuidad Lineal區開咗間健身中心，仲到過場分享佢保持健美身型嘅秘密。35歲嘅C朗透露佢通常每周做捲腹動作四至五次，每次200或300下。