今年的母親節，大家都在疫境之下慶祝。對黃澤鋒這一家三口來說，首個母親節更是百感交集。去年太太陳麗麗52歲高齡誕下愛女黃熙恩（乳名小黃妃），分娩時身體出現妊娠毒血狀況，經歷生死一刻。
陳麗麗回想：「好緊張，冇諗過真係生咗出嚟，先至叫做安全，臨生嗰刻，都係未安全呀！」
一家人最緊要齊齊整整安安全全。教游水教打拳的黃澤鋒，因疫情停工了，孭起成頭家的爸爸說：「總之安安全全度過，一家人冇事，錢銀，濕碎，我有辦法再諗！」
到黃氏一家屯門居屋家訪，黃澤鋒預先說：「我哋屋企地方淺窄唔好介意影出嚟唔靚呀！」室雅何須大？愛已無限。
撰文：文嘉龍
攝影：林德雄
估唔到第一個母親節係咁
慶祝母親節，剛好「小黃妃」亦滿十個月，陳麗麗說可以兩母女互相慶祝。「最近佢第一句就係叫『爹爹』，我唔會介意佢叫邊個先㗎！」
兩公婆分配好角色，陳麗麗指住老公，「佢係慈父、我係嚴母！」可愛精靈的「小黃妃」的確全程眼仔睩睩望着「爹爹」訪問，又會扭計要陪玩。黃澤鋒說：「佢好挑通眼眉，識睇眉頭眼額㗎，嗱，講咗咁耐嘢，佢都係望實我嘅，因為我就係黃大仙，有求必應，通常老竇都係乜都會畀你，我連大聲啲講嘢都好少！」父親在女兒面前，冇晒符！
疫情下停了教練工作，黃澤鋒近三個月每天都在家陪伴「小黃妃」，「尤其經歷呢次疫情，你更加要積穀防饑，有乜突如其來嘅嘢，咁我點呢？個女點呢？其實每日都驚㗎！所以估唔到第一個過嘅母親節係咁過囉！」
陳麗麗說：「舊年仲喺個肚度，今年出咗嚟，你就會留意佢每一個階段成長，所有嘢都係好值得懷念，有時會諗去到佢十幾歲個樣會點呢？𠵱家我就成日攬住佢啜啜，到佢大啲會唔會攬返我錫錫㗎？」
對囡囡的教育和期望，只想她做個開心快活人。媽媽說：「要逼佢學嘅就係游水啦，佢爸爸都係游水，所以一定要識，拳都會教佢，因為佢係女仔，要保護自己，要自衞，我哋會老，佢有乜事，自己都可以有返兩道散手，唔好俾人蝦先啦！」
高齡產女，麗麗仍想再追多個，也是為了有個細佬妹可以陪「小黃妃」。爸爸說：「個人冇咁孤苦伶仃，我驚佢第日大個老咗，阿爹阿媽走咗之後，咁就冇咯喎！有啲兄弟姊妹都還好，起碼真係有一個親人一齊囉！」說着說着，「小黃妃」又嗌着「爹爹」扭計了。
後記：心肝寶貝
趁「小黃妃」扭眼瞓「冇電」，一家三口趕緊到樓下的公園拍攝，澤鋒說：「咁好陽光佢就會精神！」
當日媽媽身上穿上一件有「Miracle 」字的衫，正是「小黃妃」的英文名字，「覺得係一個奇蹟，所以就叫呢個名！」爸爸也說：「對我嚟講都係奇蹟，喺呢個age都有小朋友，陪伴佢多啲啦，每個人嘅人生過程都唔同！」
「養兒一百歲，長憂九十九」，是這對新手爸媽現在最能體會的說話！媽媽還爆料說，「小黃妃」要聽爸爸唱歌才入睡，但不是唱甚麼兒歌，竟是梅艷芳的《心肝寶貝》。「唱過許冠傑，唔鍾意，唱其他歌，唔鍾意！」叫澤鋒即場唱返兩句，「心肝寶貝，突然在眼前……」
「小黃妃」眼定定，這首肯定是她最愛的歌聲。