今日係母親節，唔知大家有冇買花或者其他禮物送畀媽媽呢？要盤點近年球壇「最佳孝順仔」，基斯坦奴朗拿度（C朗）絕對當之無愧。先前有報道，話呢位祖雲達斯球星喺葡萄牙返都靈準備意甲重開前，送咗架名車畀阿媽預祝母親節快樂，雖然對身家幾十億嘅C朗嚟講，呢啲只係濕濕碎，但份心意先係最無價。可能有人嫌C朗有時太刻意去塑造「孝順仔」形象，但只要了解C朗嘅成長背景，就明白佢點解咁錫阿媽。
C朗識女友要阿媽過目
話說C朗老竇喺05年因肝衰竭病逝，阿媽就一直身兼父職養大C朗四兄弟姊妹，而且係喺經濟最困難期間生咗C朗，所以C朗非常感恩，名成利就後不斷想將最好嘅畀晒阿媽，甚至傳話佢每次拍拖，都要帶女朋友等阿媽過目，當中前女友艾琳娜就係因為同C朗媽不和，最後分手收場，但現任女友佐真娜似乎就冧得掂呢位老人家而過關。另外，C朗今次突然返家鄉馬德拉島避疫，亦係因為爆出阿媽中風入院，擔心下先返葡國探望，點知武漢肺炎爆發，搞到佢冇再返意大利，等到家陣疫情好番少少先返都靈準備意甲復賽。
羅馬新星有個網紅辣媽
同C朗都係愛母之人代表嘅，仲有法國球星保羅普巴。普巴都好鍾意喺ig分享天倫樂，亦鍾意夾埋佢兩個兄弟費倫丁普巴同馬特斯波格巴，一見到阿媽就四個打成一片；呢位曼聯中場最近就喺疫情期間，上載咗一段玩波通阿媽坑渠嘅短片好搞鬼，而佢過去亦曾趁阿媽生日，寫文感激阿媽養育之恩：「呢個阿媽，先係一生攞過比世界盃仲好嘅獎盃。」
印象深刻有C朗同普巴，但唔代表其他球星唔孝順，只係可能冇咁顯眼，好似利物浦前鋒羅拔圖法明奴近日都有幫阿媽慶生，而西班牙早一周就率先歡度母親節，唔少西甲球星都有畀阿媽喺社交網絡「上鏡」，好似皇家馬德里隊長沙治奧拉莫斯同馬德里體育會中場沙奧尼古斯等。不過，我求大俠就好想知羅馬新星、20歲嘅尼高路辛尼奧路，會唔會買護膚或化粧品畀佢阿媽，事關佢年僅41歲嘅阿媽法蘭絲嘉，本身就因為鍾意自拍成為網紅，亦係球壇數一數二辣媽，唔知佢同NBA球星當錫個阿媽寶特芘，邊個會當選你心目中嘅球壇最靚母親呢？