「乖乖哋啦！」51歲的劉雅麗，輕拍着73歲媽咪包曉華的膊頭叮囑。唱家班的劉媽媽包曉華現半退休，身形富泰，外表不似73歲，但作為獨生女的劉雅麗，眼見媽咪年紀漸老邁，「佢嘅健康係我嘅福氣，𠵱家好似我係阿媽，成日哦佢。」劉雅麗的眼睛最似媽咪，兩母女笑起上來都有一對「腰果眼」。
想女兒有歸宿
曉華姐是香港音樂人協會主席、創會執委及司庫，於60年代踏足歌壇，擅長唱國語和英文歌，曾經是海洋皇宮、金漢、漢宮夜總會等駐場歌手，70年代為黃梅調電影做幕後代唱。劉雅麗受媽咪影響，3歲已經識唱《高山青》，「佢鍾意織冷衫睇愛情小說，佢做乜，自自然然跟晒佢，做人都係，佢教法唔縱，亦唔會話你知世界美好，反而話好多衰人小心啲。最記得第一次拍拖18歲，佢同我講一樣嘢，好好笑，我覺得我阿媽好大膽，佢話女仔點都有第一次，你覺得值得嘅咪去囉，但千祈唔好有小朋友，累咗下一代，我直情呆咗。」為人父母，都想女兒有個好歸宿，曉華姐說：「我都有擔心，但我成日覺得天意囉，隨緣，你冇辦法，唔通夾硬塞個男人，個男人唔好仲衰！」有冇介紹男仔給劉雅麗？曉華姐笑說：「佢好奄尖腥悶，我唔會介紹。」
撰文：余燕儀
攝影：仇志德
場地提供：台北．寬巷子（海港城）