香港噚日有立法會內會主席選舉風波，民建聯李慧琼「奪權」強行主持會議，仲要有戴黑手套嘅保安護住同民主派議員對峙，點睇都係名不正言不順。不過，英國BBC官方最近搞嘅一個全民投票就唔同，選英超停擺前本季最佳，榜首利物浦擸晒本季英超最佳球員、最佳年輕球員同最佳領隊獎項，又喺最佳11人入面成為大贏家，絕對實至名歸。
國際足協將換人名額加至五個
雖然國際足協已經通過每場比賽換人名額加到五個，不過英超停擺，重唔重啟到都仲傾緊，好似白禮頓等小球會反對重開後喺中立場上演，行政總裁巴伯仲話唔止聯賽最尾六隊反對，睇落好似有好多阻滯。雖然唔知聯賽開唔開得番，但英國權威新聞機構BBC就喺網上搞咗個投票，一人一票選出停擺前英超最佳球員同最佳領隊等嘅獎項，大家應該估到喺榜首領先成25分嘅利物浦，一定係大贏家。
利物浦今季聯賽表現咁好，停擺前29場錄得27勝1和1負，贏多2場就可以捧得球會30年嚟首個聯賽冠軍，而成隊表現最穩定嘅隊長佐敦軒達臣，以23%得票率成為年度最佳球員，力壓得票率17%嘅隊友沙迪奧文尼。最佳年輕球員都係由紅軍球員奪得，右閘阿歷山大阿諾特今季助攻助守，以12次助攻排助攻榜第2位，僅次奇雲迪布尼，因此今次投票以47%得票率大比數擊敗得10%嘅曼聯前鋒拉舒福特。紅軍領隊高普就以55%成為年度最佳領隊，而第二位就意外啲，唔係其他傳統前列球隊嘅領隊，而係今季殺上第七嘅升班馬錫菲聯領隊基斯韋達，得票率為25%。
最佳11人B費力抗7紅軍
另外，BBC亦公佈埋本季票選嘅最佳英超11人，紅軍除咗上面兩位球員，仲有艾利臣比加、華基爾雲迪積克、安德魯羅拔臣、沙迪奧文尼同穆罕默德沙拿都齊齊入選，另外四位分別係曼城嘅迪布尼同阿古路、李斯特城新中堅蘇恩古，仲有一月先加盟、只幫曼聯踢咗五場英超就俾人捧上天嘅中場波基斯費南迪斯。至於本季最佳英超入球，就由熱刺嘅南韓前鋒孫興民喺主場對般尼嗰球「美斯式」千里走單騎奪得。
雖然利物浦喺今次選舉中玩晒，但一日未正式捧英超都未心足，希望為復賽隨時準備好，周四就好似阿仙奴同熱刺咁，已經有限度重開美活訓練基地，畀球員單獨操練，跑步為主，每時段60分鐘，每節最多只能三個人使用，而且部份大樓維持封閉，只會有醫療人員遠距離監察球員跑步訓練。
