嚟緊嘅星期日就係母親節，但今年嘅母親節同往年好唔同，舊年呢嗰時候，好多年輕人仲未預見到，舊年下半年爆發反送中抗爭運動。差人濫捕之下，好多年輕人由舊年中開始被拘捕收押甚至判刑，今年母親節唔可以再同媽媽慶祝，有見及此，大專學界國際事務代表團前發言人張崑陽、香港眾志嘅羅冠聰同黃之鋒，仲有區議員梁晃維同梁凱晴，一齊發起「母親節特別活動──給在囚手足母親的心意卡」行動，喺全港三區收集心意卡。
三區擺街站收集
佢哋話係普天同慶嘅母親節，喺牢獄囚禁咗一班無法同母親共度佳節、感謝親恩嘅手足，除咗牢獄之苦，鐵窗外嘅親人同樣受苦，有啲家庭失去咗經濟支柱，有啲失去咗家庭伴侶，有啲眼睜睜睇住送仔女嘅囚車駛去監獄。手足佢哋嘅家庭、伴侶同樣喺痛苦下期盼住團聚，所以佢哋希望透過收集關心在囚手足嘅市民力量，轉化成為一張張嘅心意卡，將呢啲心意卡交到在囚手足嘅母親手上，用群眾力量緩解佢哋心中嘅不安。
市民可以親筆撰寫心意卡交去三區街站，或者即時填心意卡都得，所有心意卡同信會由眾志轉交在囚手足嘅媽媽。呢個行動有好多網民支持，有連登仔話好多手足媽媽都係黃，默默地低調地支持啲仔女，到𠵱家佢哋仔女還柙，又要應付官司，仲有外人親戚嘅壓力，佢哋好辛苦，希望畀啲安慰佢哋。
李八方