現今世代，在網上分享小朋友的生活點滴，對一般人來說再也平凡不過，但對明星夫妻來說，到底應否讓小朋友在閃光燈下成長，有不同的想法。陳柏宇（Jason）和老婆符曉薇（Leanne）只想給囡囡一個快樂而平淡的童年，認為沒必要收收埋埋，即使面對批評也大方接納，因為兩人也只是一對平凡的家長。Jason最近放聲氣想追多個女，不過Leanne就相反想要個仔，惟有聽天由命。
採訪、造型：高綽盈
攝影：郭賢興
服裝提供：Cocktail、REDValentino、Shiatzy Chen、Giuseppe Zanotti（on Leanne）、kids21（on Abigail）
飾物提供：Tiffany & Co.
場地提供：The Tiffany Blue Box Cafe
陳柏宇和符曉薇於2017年結婚，翌年誕下囡囡陳羿辰Abigail（Abi），只有19個月大的Abi，在鏡頭前非常淡定，全因平日「訓練有素」，陳氏一家公開囡囡的樣貌，更大方分享私生活，Jason幫囡囡開設個人Instagram賬號，追蹤人數更破4萬，Leanne卻是從朋友口中得知，「全權由爸爸管理，我連密碼都唔知，其實我好想一齊管理，我覺得爸爸所post嘅相完全冇美感可言。」「我哋有討論過要唔要將Abi收埋，但我唔想令佢覺得佢嘅童年好特別，一見到記者就要遮住佢個樣，加上我先生一直冇當自己係藝人咁睇，好似普通家長咁去分享小朋友嘅生活。」至於外界有批評，指應該保護小朋友的私隱。
接受批評
身為公眾人物少不免要面對批判，Leanne直言很喜歡去看留言，「記得第一個因為留言而感到傷心嘅post，啲人話我哋因為有BB而棄養動物，我覺得好嬲，就算當時我先生對貓敏感，我都冇諗過畀啲貓其他人然後同佢一齊住，而係努力搵方法去解決呢個問題。」雖然委屈，但她學懂坦然面對，「你冇可能令每個人都鍾意你，可以改變嘅就只係自己嘅心態。」兩人更因分享囡囡的生活而屢次登上新聞，其中一次幫Abi沖涼的影片，因沒有為囡囡「打格仔」而受抨擊，Leanne表示無奈，「我哋覺得BB露上半身冇乜問題，但每個人嘅價值觀都唔同，大家嘅出發點都係好嘅，希望我哋好好保護BB，而唔係想傷害我哋。」
近年轉型為KOL的Leanne，為囡囡打扮風格非常多變，「Abi個樣比較似男仔，之前會幫佢着得型啲，但最近佢頭髮長咗可以紮辮，就打扮得女仔啲，如果係爸爸同佢出街，通常都只會着牛仔褲同T-shirt。」她自言有計劃生三個，但Jason卻拒絕，「Abi出世，佢同我講唔想再生第二胎，佢實在太愛Abi，想像唔到要將呢份愛分畀其他人，唔想對任何一個人唔公平。」不過隨着囡囡長大，想法就有所改變，「最近佢見到Abi好鍾意小朋友，有時帶佢出街見到小朋友，佢都會想去摸佢哋同佢哋玩，所以有計劃生第二胎。」不過Jason想生多個女，而她就想生仔，惟有聽天由命。
心態重要
後日是母親節，Leanne坦言Abi年紀還少，「始終佢唔會突然寫張卡畀我，不過對我哋嚟講係一個好重要嘅日子，我同Jason都係來自單親家庭，所以我喺母親節嘅角色就係去籌備同煮飯，今年都會同媽媽、奶奶一齊食飯。」不過Leanne也寄語囡囡，「我唔介意佢大個咗之後做任何工作，最緊要佢鍾意，同埋用乜心態去做。」
更多精采時尚內容，盡在 http://add.appledaily.com。