鄧麗君（Teresa）生前的管家張金美重踏鄧在赤柱的舊居，回味她與Teresa的生前點滴，舊居位於佳美道18號，為一幢兩層高建於50年代充滿歐陸風情的大宅，可俯瞰赤柱海景，曾住在這裏十多年的金美憶述，Teresa平日最愛坐在花園嘆茶賞花。惟大宅拆卸後重建成三層高牆包圍的洋房，人面全非，張金美欷歔說︰「全部唔同晒，25年唯一冇變得返呢幅牆同棵樹。」
花店難忘鄧麗君隨和
金美1991年開始任大宅管家，在這裏過着她一生最快樂的日子，照顧偶像起居飲食，4年後Teresa離世，她繼續留守大宅打點，直至鄧的家人2004年將地皮賣了才遷出，她說︰「我住喺度嘅日子仲多過鄧小姐，佢兄弟姊妹對我好，畀我繼續喺度住。」
Teresa逝世5周年時，大宅曾開放給公眾參觀，她留守大宅全因一個承諾︰「鄧小姐臨去泰國前同我講︰『金美，你要幫我睇住間屋，我淨係相信你一個。』」說罷淚水徐徐落下。
提到Teresa，金美回憶偶像愛看海，經常沿海邊漫步到海灘游水，她指着海邊一間餐廳說︰「呢間餐廳以前係粉紅色外牆，鄧小姐最鍾意粉紅色，佢每次嚟都坐一樓近窗邊位置，約朋友傾偈，一坐就兩、三個鐘。」
25年物換星移，Teresa以前經常光顧的花店卻仍在，老闆亦難忘鄧麗君的隨和︰「鄧小姐幾日就會落嚟買玫瑰花返屋企插，特別係粉紅色，佢把聲好溫柔，好有禮貌，每次見面大家都會閒話家常。」
60歲的金美是緬甸華僑，愛聽鄧麗君的歌，來港後加入歌迷會，有一年Teresa要去法國進修3個月，歌迷會會長就推薦了文靜的金美陪行照顧其起居。法國之旅中，Teresa與金美建立了姊妹情誼，回港後金美就被邀做管家︰「我呢世人最開心係喺佢身邊，佢教識我好多嘢，例如包餃子，佢話女人唔識包會嫁唔出。」在金美心中，Teresa從未離開過︰「我當佢去咗旅行，事實上我全屋都係佢嘅相，日日聽住佢嘅歌，佢一路陪住我。」
■記者曹家誠
■攝影沈健程、陳慧安