體壇停擺，英超20間球會都希望恢復賽季，但有報道指，榜尾幾隊對賽會計劃喺中立場用閉門形式完成餘下賽事嘅安排好唔滿意，仲有可能會阻撓聯賽重開。
英國傳媒報道，支持復賽嘅球隊威脅要用投票手段，將包艇嗰三隊踢落英冠，以迫使佢哋轉軚支持喺中立場復賽。
上個禮拜英超同各隊代表開會後，擬訂出Project Restart嘅重啟英超計劃，希望以6月12日重開英超為目標。𠵱家英超要為重開聯賽同中立場嘅決定進行投票，又話三間喺護級區嘅球隊般尼茅夫、阿士東維拉同諾域治已經被警告，假如佢哋阻撓聯賽重啟，其他球會就會用投票方式決定邊三隊降班，暗示三支榜尾嘅球隊好大機會成為最高票數嘅降班隊伍。
不過，𠵱家六支下游隊都希望英超唔好重開，因為閉門作賽，佢哋會失去比賽日收入，仲可能會無法保住英超席位。有指英超各隊喺下周一就會開始為聯賽重啟嘅細節商討，如降班嘅決定、中立場嘅細節等等。