近年越來越多人投身Slash，何嘉莉也一人擔任妻子、媽咪及KOL工作，早前回到幕前參與微電影，稱得上是一位多功能的時尚媽咪。她說：「心態上就還好，我自己都貪玩，如果見到朋友會唔記得阿媽身份，不過喺屋企對住佢哋就唔會。」
大仔Jean現時七歲、大女Zoe兩歲及細女Raina已一歲，何嘉莉坦言子女性格不同，「個仔比較靜，心思細密一啲，鍾意傾偈，攬攬同錫錫；大女就比較active，自己會識搵樂趣，但有時又會嗲吓你，最細個女暫時未知係點，不過感覺同大女又會唔同。」問到小朋友會否爭寵呷醋？她笑說：「我盡量做到好公平，細女得一歲應該未識啲乜，所以盡量focus喺大仔大女，佢哋都會爭嘢玩。」不少父母希望與子女如朋友般相處，她也不例外，「但有時見到佢哋唔聽話，阿媽個格就會出咗嚟，我算係緊張媽咪，比較嚴格同注重品德。」不過她每日會與子女傾偈及說故事。
寓工作於娛樂
熱愛時裝的何嘉莉，抗疫期間少了外出，也少了發揮空間，「真係冇機會，湊小朋友着得靚都冇用，不過都會留意潮流，大概知道興乜款式、顏色。」為子女打扮時，她也遇過碰灰，「男仔可以比較求其，可能純粹係顏色上，有時幫佢襯咗會reject，佢開始有自己喜好。大女比較男仔頭，有時買啲比較得意、女仔嘅嘢，佢會話我唔要。」
何嘉莉早前更參與防癌會的微電影拍攝，「好耐冇做幕前工作，覺得個感覺返番嚟，𠵱家變咗工作反而係娛樂，平時喺屋企就係返工，有機會出去做嘢覺得好正，好relax。」後日是母親節，她表示只會簡單慶祝，「有三個小朋友反而簡單慶祝，因為好難勞師動眾去準備，多數喺屋企食飯，開開心心就OK。」
造型、撰文：陳蔚渝
攝影：郭賢興
服裝提供：Sportmax、Chloé
場地提供：Vive Cake Boutique
更多精采時尚內容，盡在 http://add.appledaily.com。