作為本港最大嘅免費電視台TVB大台，早前煞停港台諷刺時弊嘅《頭條新聞》，民協副主席何啟明（圖）即刻帶隊到大台抗議，高呼「無綫電視最陰濕，停播港台無腰骨」。即刻觸動大台神經，出律師信都不特止，前日仲告上法庭，話何啟明誹謗，話何嘅言論嚴重損害大台作為「中立」、「專業」、「可靠」嘅新聞廣播機構的「聲譽」。
話令人覺得大台配合政府
大台喺入稟狀度話，其實早喺2016年已經要求停播港台節目，話港台自己都有電視頻譜，你播我又播咪重複播囉，浪費資源。佢仲話何啟明嘅言論譁眾取寵，令人覺得大台偏頗、配合政府打壓新聞自由、聽命於中央，大大損害聲譽同公眾信任咁喎，寫到明要何啟明收聲兼賠錢。
well，一講起無綫新聞，八方即刻諗起喺鏡頭彈出又彈入舉嘅「事事旦旦」牌，呢句經典對白流傳咁多年，不過都唔見大台要採取法律行動，唔通「事事旦旦」唔算誹謗？