星期一啱啱先同昂熱續約嘅中場阿爾及利亞國腳艾美拿尼,即晚就喺住所大廈嘅庭院自瀆被警方拘留。現年22歲嘅艾美拿尼喺周一同昂熱續約到2023年,但當晚因性暴露狂俾警方帶返警署問話。法國傳媒報道指,事件發生於當地時間周一晚上10時50分,鄰居聲稱睇到佢喺庭院自瀆,仲望着住係底層嘅一名女士。艾美拿尼嘅律師話,其當事人並冇以任何人為目標,無意冒犯任何人。艾美拿尼接受警員問話時承認自己行為不檢並已暫時獲釋,不過之後需要上庭並面臨罰款處分。檢控官透露,艾美拿尼四月都有涉及類似嘅罪行,但目擊者認唔出佢而脫罪。