一直俾球迷批評執法偏袒曼聯嘅前英超球證韋比，已經「掛哨」6年嘅佢喺近日嘅一次訪談中就提及2009年熱刺對曼聯一役中嘅誤判。熱刺喺嗰場原本以2:0領先，不過當時嘅曼聯中場卡域克及後博得12碼，韋比憶述當時嘅情況：「我原本預咗熱刺嘅球員會有好激烈抗議，但我淨係睇到熱刺門將靴里奴高美斯嘅驚訝表情，喺幾秒後我就知道自己今次做錯咗判決。」當時慢鏡清楚顯示高美斯先撲到皮球先撞跌卡域克，不過當時旁證並冇向韋比說明情況，之後紅魔由基斯坦奴朗拿度主射12碼入網追成1:2，曼聯及後仲一鼓作氣再連入四球，最終以5:2反勝熱刺。