由國際特赦組織香港分會、香港記者協會同香港外國記者會合辦嘅「2020年人權新聞獎」，噚日正式公佈得獎名單。《蘋果》今屆獲得兩項獎項，包括「多媒體（中文）」大獎，同埋「突發新聞（中文）」優異獎。
TG後遺症系列獲優異獎
其中靜態調查組製作嘅「囚牢之疆」專題網站，透過一系列受新疆集中營迫害嘅少數民族個案、抵抗強權壓迫嘅人權律師，同埋志願者嘅故事，踢爆中共以「再教育」為掩飾，行滅絕少數民族之實嘅手段。專題網站獲得人權新聞獎嘅「多媒體（中文）」組別大獎。
今屆人權新聞獎，唔少得獎作品亦都同反送中運動有關。《蘋果》靜態「追Click組」記者潘柏林、陳兆楷同王心義，合力負責嘅「反送中運動催淚彈後遺症系列」，亦都獲得「突發新聞（中文）」優異獎。香港人權自由受到全方位打壓，八方喺呢度都恭喜各位得獎同事以及行家，繼續為捍衞人權出力。香港人加油！