4月30日開始放假，一連四日，足夠去泰國或日本行一轉。往年如此，左丁山一定不在香港，不過現今情況特殊，行不得也哥哥！本欄講開嘅學生Y變咗見習生Y變咗年青賓架Y，依家人在曼谷大銀行返工，左丁山好想去曼谷搵佢一聚，但相信有排等嘞。前幾日講及2020年畢業生畢業不逢時，師妹R得聯合國offer，竟然畀疫情破壞，只能嘆一句無奈；賓架Y於2011年畢業，就比較順風順水，讀完碩士，搵到銀行工，考FRM，考HKIB，對中大經濟系畢業生嚟講，並不困難，於是可以升職跳槽，出外闖蕩，依家搵到份工在曼谷上班，正好磨練「一路」知識，佢上一份工在杜拜，令佢有機會行遍中東（除咗伊拉克）諸國，又去埋中亞細亞，對「一帶」有一定接觸，假以時日，有機會成為「一帶一路賓架」！
之不過，中國雄心勃勃開拓一帶一路，投資近數千億美元之後，還未見有甚麼收成，便遭C19疫情打擊，航空交通陷於停頓，商務往來嚴重受阻，基建工程難以順利開展，倘疫情延續，曠日持久，一帶一路工程基建有爛尾可能，中國一手推動成立之亞洲基建銀行還有乜事情好做？
中國古語云謀事在人，成事在天，毛澤東不服氣，要與天鬥爭，講人定勝天，卒之死中國人無數。年紀大咗，人就會明白，與天鬥、逆天而行，九成九失敗收場。不幸在2020年展開大投資計劃嘅話，任憑你有乜本事，鴻圖大略，做生意點過肺炎呢一關噃！特朗普到2月28日還是聲大大：「美國未死過一個人！」，到咗5月4日，美國已有119萬人確診，死亡6萬8千6百人，死亡率係5.8%！而特朗普競選總統連任，在2月28日看似必勝，現在民望已落後拜登8個百分點。隔咗兩個月啫，事情變化如此大，人點樣可以勝天吖，特朗普咁強橫，去年聖誕節佢點會諗到自己有可能會輸大選！習近平咁大雄心壯志，去年12月又點會估到中國經濟會在2020年首季下跌6.8%，進入救亡狀態吖。俄羅斯普京係強人中之強人，上天識揸飛機，下海能潛游，陸上能伏虎，掌權20年，成為俄羅斯新沙皇，今年志得意滿要修改憲法，令佢長期掌權，點知道俄羅斯疫情難控，全民公投修憲受阻，油價跌到負值，大損俄國外匯收入，前幾日總理（普京馬仔）確診，內閣多人要隔離，令普京變成獨夫坐困愁城！上天專收叻仔猛人，誰人敢講人定勝天？年青賓架Y順風而行，有得着。強人叻人要創造時勢，反被時勢玩弄，庚子年畀我地好大人生訓示！