正當一般巿民要喺網上排隊登記，先攞政府遲咗幾個月先派到嘅「CuMask」布口罩之際，一眾行會成員噚日據聞已率先獲政府派發一人一個。本身有「CareHK匯愛」口罩廠嘅經民聯議員林健鋒，噚日一邊向記者示範戴攞到嘅CuMask（圖），一邊笑住話自己嘅出品先係最好：「唔係賣花讚花香，呢個係事實嚟㗎！」
林健鋒又話，應該提供唔同款式畀一家大細用，「夜晚個個洗完之後，第二朝攞錯咗，有啲人會有唔同嘅擔心。」佢覺得政府喺口罩嘅設計同包裝，可以再擺多啲心思，話其實好多漫畫、電影主角嘅圖案都好得意，只要唔係侵權，都可以諗諗加落個布口罩。不過，八方相信無論幾得意都好，政府都唔敢加隻小熊維尼落個口罩度嘅。