武漢肺炎喺世界各地大爆發，全球足球賽事都停擺，中超當然唔例外。效力中超北京國安嘅南韓外援金玟哉，呢段時間返咗南韓兼上咗當地一個直播節目大吐苦水，提起自己喺中超踢波嘅辛酸史，包括鬧爆防線上嘅國腳級中國球員水準差，連累司職中堅嘅自己不斷補位，踢得特別攰。之不過金玟哉呢段說話一出，就即刻俾中國球迷鬧爆，最後搞到要耍冧之餘，隨時仲要被球會重罰。
金玟哉喺上年一月加盟北京國安之後，就同前鋒出身、但係近年轉型踢後衞嘅中國國腳于大寶同王剛、李磊，一齊鎮守防線。不過金玟哉喺南韓一個節目度就話，一班後衞嘅防守意識好差：「我隊波防線上嘅球員都係前鋒出身，防守能力不足，就算係中國國家隊成員，但係補位意識好差。兩閘上去唔回防，我得一個人要不停補位。40度高溫下比賽，佢哋真係唔回防！所以喺南韓國家隊踢波會舒服啲，其實其他外援有時都踢到好攰，比賽緊都不停搖頭，但係中國球員就唔係好理解呢種心情喇。」
網民狂插 球會或重罰
節目播出之後，中國球迷眼見金玟哉咁踩自己人，就當然嬲到爆喺網上反擊，仲叫國安快啲炒金玟哉魷魚。就連中國U16隊長何小珂，都狠批呢位南韓國腳，話佢肥到隻豬咁，快啲執包袱去歐洲踢波。金玟哉心知不妙即時已經向球會同隊友道歉，仲解釋話節目入面出現嘅爭議言論係因為電視台喺剪輯方面出咗問題，其實自己喺節目度都有讚中國足球，但係全部內容都冇播出。雖然金玟哉已即時道歉，但係擅自接受採訪已經違反咗球會規定，所以金玟哉都將會面臨嚴厲嘅處分。
艾沙拉維都想做逃兵
雖然好多外援去中超踢波都係為咗搵銀，之但係辛苦嘅又點止金玟哉一個。曾經喺中國搵食兩年嘅土耳其前鋒布拉克爾馬斯只係話中國人飲食習慣奇怪，咩古靈精怪嘢都放入口，以後會有更多病毒喺中國傳出去。一句說話就直接得罪一班小粉紅，最後爾馬斯當然都係跪低耍冧。至於家吓已經離開中超嘅丹巴巴亞同泰維斯，喺踢緊中超期間同樣唔好受，丹巴巴亞就俾敵軍球員以種族歧視嘅言語羞辱，最後雙方仲喺場上發生激烈衝突；泰維斯就喺受傷期間，帶埋一家大細去上海迪士尼玩，到今時今日中國球迷都仲經常搬呢件事嚟揶揄佢。
今季加盟上海申花嘅意國前鋒艾沙拉維，近日同廣州恒大教練簡拿華路進行直播對話時都話，早排想逃離中國：「當疫情開始喺中國爆發，我已經想返羅馬，所以向申花表達咗自己嘅意願。」不過最後就因為冇意大利球會想簽艾沙拉維，搞到佢最後被迫留喺中國。