武漢肺炎摧毀全球體壇，世界各地聯賽自三月起陸續停擺，就連足智彩亦都由3月23號，開埋最後一場澳職之後，已經超過一個月無球賽畀馬會開盤。雖然疫情期間，好似白俄羅斯、塔吉克呢啲比較冷門嘅地區都仲有波踢，但馬會始終冇再引入新嘅聯賽，令一眾球迷等了又等，去到五月終於出現曙光！事關原定二月尾開鑼嘅韓職，早前宣佈今個禮拜起正式復賽，而且首場賽事仲設有Twitter、 YouTube等直播，「慰藉」一班餓波已久嘅球迷。
足智彩喺網頁暫定受注球賽頁面，列出咗兩個禮拜12場韓職將會開盤，打頭陣係香港時間聽日傍晚六點，由上屆冠軍全北汽車主場迎戰水原藍翼，話說兩隊都係今季亞冠盃參賽球隊，所以呢場開鑼戰肯定會好精采。
雖然韓職同三色台傾掂轉播權，點知開鑼戰就冇得播囉，最快都要等到下個禮拜日，85台先會直播FC江原對FC首爾嘅首輪韓職最後一場賽事。不過各位又唔使失望嘅，事關韓職官方都知道全球球迷餓咗波好耐，所以特別喺韓職官方Twitter及YouTube頻道，全球免費直播禮拜五嘅開鑼戰，仲附設英語旁述，大家記得mark實喇！至於首場韓職有乜心水，當然要留意住我哋《蘋果》一眾名家嘅推介喇！