求驗客手記:德甲鐵定月尾回歸 意甲祖記搶閘復操

求驗客手記:德甲鐵定月尾回歸 意甲祖記搶閘復操

跟據BBC、路透社同法新社報道,德國總理默克爾周三表示德甲將喺五月重開,而德國政府同地方政府亦已同意,德甲同德乙可喺五月下旬恢復比賽,德國足總將會負責決定重開日期。

據多家傳媒報道,德國政府已同意德甲同德乙喺五月下旬重開,而德國足總同各會代表今日會舉行視像會議,商討聯賽重開嘅各種安排,包括賽程以及德國盃舉行日期。早前已有報道指,因武漢肺炎肆虐而停擺多時嘅德甲同德乙,將喺5月22日復賽。直到周三,德國總理默克爾正式宣佈,德甲可以喺今個月內回歸。

如果德甲真係喺五月下旬復賽,將會係歐洲五大聯賽中,首個唔使停擺嘅賽事。據了解,德甲同德乙共36間球會中,有超過12間因聯賽停擺而面臨破產危機。家陣聯賽終於重開,雖然因要閉門作賽而冇門票收入,但可收到電視轉播費用,將可解財困球會嘅燃眉之急。

至於意甲重啟仲要等吓,不過各球會已經由周一起恢復有限度訓練,其中班霸祖雲達斯,喺周二有「死神」艾朗藍斯、隊長基亞連尼同邦路斯等球員喺訓練場做個人練習。不過C朗就冇出現,因為佢啱啱先喺葡萄牙返到意大利,要隔離14日先至可參加練習。咁大家點知道佢返咗嚟?原來佢出機場時有成支車隊等佢一家,仲有警察開路㖭,係人都知佢已經返到都靈。為咗令意甲重開,各方更可話係出盡法寶。最新建議更出位,話將比賽改喺卡利亞里同巴勒莫主場閉門作賽,因為兩間球會位處離島,同意大利本土分隔,可以起到隔離作用之餘,仲可刺激當地經濟。