廣播處長梁家榮早前喺財務委員會特別會議答問題，秒殺建制議員連點擊率同收視率唔識分，又暗寸何君堯fb同港台冇得比，咁何已完梗唔放過港台啦。何已完噚日借辯論預算案開港台拖，話自己fb有十幾萬人like、多過港台，又話港台買like，點知今次又即場俾民主黨林卓廷秒殺，寸何已完睇清楚啲數先噏。
阿廷秒殺：政府部門點出呢條數？
何已完噚日先寸港台點擊率有過千萬有乜重要啫，話follower（跟隨者）有錢就可以買喇！又話港台fb只有一萬人like，佢就有16萬人like，用十億先得萬幾follower，咁佢咪要用成百億？之後仲拎本紅色筆記本細數自己「戰績」，聲稱自己語無倫次、亂咁講嘢嘅片段同港台節目點擊率相若，叫人唔好同佢講點擊率，用點擊率同港台加個光環。
不過何已完噏完立即俾林卓廷秒殺，阿廷話港台係政府部門，叫何已完唔該用吓個腦，點可以用公帑點買like？恥笑何：「你教吓我點出條數？唔通fb出條（賬）單『買Like』一萬個500蚊？唔好笑大人個口。」
阿廷又鬧何攻擊港台根本係胡說八道，冇事實同證據，好似港台新聞fb有65萬人like，《頭條新聞》有39萬人like，《鏗鏘集》有32萬人like，全部比何已完fb專頁為多，話佢唔鍾意香港電台唔係唔可以，但都要講返事實數據，唔係盞自己丟架。
李八方