【本報訊】全港停課逾三個月，教育局局長楊潤雄表示，學校可以自行視乎學生需要考慮補課或調整暑假，強調交由校本決定。有校長認為毋須取消暑假，「𠵱家停課不停學，大家都係禁閉式學與教，唔係放假嚟，可能老師仲辛苦過平時」，復課期間會協助學生補回停課期間的缺失。
或須延長學期兩周
浸信會天虹小學校長馮耀章表示，該校4月初已向法團校董會申請上課日延長多一星期，「嗰時預期4月27日復課，𠵱家考慮有需要再調整再多一星期，但暑期一定會有」。至於學校取消考試如何決定學生升班或留級，他指這個問題需要開會討論，「返學返咗半年，用乜準則去決定啲小朋友升班？」他個人取態是盡量不留班，並盡量在教學和課程上協助學生補回停課期間的缺失。
資助小學校長會名譽主席張勇邦亦認為不適宜取消暑假及不宜太多補課，「8月中老師要開會睇復課後啲小朋友進度如何，跟住檢視新學年上學期，睇使唔使做課程重整去重溫停課課程問題」。
他指，整個生態不適合貿然取消暑假，「𠵱家停課不停學，成效幾多都好，大家都係禁閉式學與教，唔係放假嚟㗎嘛，可能老師仲辛苦過平時，因為平時講書35分鐘搞掂，但做錄影課堂可能花五、六個鐘先拍到一堂」，有部份教師可能要工作到7月才能停下來，8月才有機會休息。
■記者張文鈴