過去喺費格遜時代效力過曼聯嘅球員，一定都領教過費Sir嘅「開風筒」功力，近日曾經效力紅魔超過八年嘅艾拉喺受訪時就講番自己被「狂吹」嘅經歷，指一次全隊上下冇球員為久候嘅球迷簽名，費Sir就喺大巴上爆粗大罵子弟兵，話班球員愧對一眾米飯班主。艾拉諗番起嗰日曼聯踢完一場季前熱身賽，班隊友同佢都因為太攰就唔理守候嘅球迷，立即衝咗上大巴。過咗一陣艾拉就見到費Sir開始幫一大班球迷簽名，仲簽咗成45分鐘。費Sir上番大巴梗係大開風筒啦：「你哋當自己邊個？佢哋都係出糧畀你嘅人，𠵱家仲唔立即落車去簽名！」講真呢班大帝見到費Sir佢老人家簽咗咁耐名都唔識郁，又真係唔抵爭嘅。