Jessie做咗咁多年記者，總算有幸去過吓國際影展見識，最難得係近距離見到班荷李活巨星，仲要係有禮又親民，不過有啲喺亞洲紅過吓嘅明星，就真係要學吓人哋啦。
今日想講吓十幾年前嘅事，當年「林石」確係風靡唔少女仔，成為大眾偶像，人氣係好勁，但Jessie就唔多like佢喇。事關有次佢有份拍一部神級導演嘅戲，演員陣容都唔係流嘅，林石諗住憑呢部戲可以衝出亞洲，可惜事與願違，點解？咪因為佢戲屎囉。
提另一半火滾
做藝人無論你真心定假意，對人對事都要有啲品。嗰次喺一個國際影展上，神級導演執導嗰部戲有份去參展，影展期間當然有唔少明星同傳媒參與，喺街撞到都唔出奇。有日Jessie做完嘢返到酒店樓下，見到林石喺度，就好自然反應影吓佢，不過林石唔單止黑起塊面，更行上前想郁手打Jessie嘅同事，幸好現場仲有其他行家喺度，見佢想郁手就影埋一份，林石經理人見到咁當然即刻去制止佢，但佢仍未罷休，仲用佢排骨般嘅胸頂向Jessie同事裝胸作勢，呢一個畫面當然又係畀人影低。
之後套戲開咗個記者會，Jessie亦有份去，仲問林石一個簡單嘅問題，喺佢拍戲期間另一半有冇去探班？林石突然黑住口面當眾指罵，嗰一刻唔單止Jessie呆一呆，連現場記者都好驚訝及譁然，一個咁普通嘅問題，林石竟然發老脾，唔怪之得佢到𠵱家都係衝唔出亞洲，係有原因嘅。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
