由全國政協副主席董建華、梁振英牽頭成立嘅「香港再出發大聯盟」，講咗咁耐噚日終於舉行啟動禮，呢壇嘢可謂集合全城建制陣營嘅人，連之前冇表態嘅超人李嘉誠，最後都係加入，但其實又唔係個個都一定要畀面呢壇畀面派對，好似城大校長郭位就堅持謹守「教研合一、政教分離」唔參加。
呢啲向北京交心嘅畀面派對，連大學校長都冇得避，噚日公佈嘅1,500個共同發起人入面，香港11間大學入面有10間嘅校長，唯獨唔見郭位，正當好多人奇怪點解冇咗郭位？城大方面夜晚回應，話城大謹守「教研合一、政教分離」，佢哋支持一國兩制，但作為學術科研機構，更加遵奉教研本業，話大學內閣集體商議後決定郭位唔加入，仲引用蘇軾《定風波》兩句名句，「莫聽穿林打葉聲，何妨吟嘯且徐行」，當年蘇軾被人誣陷同貶謫湖北後，寫咗呢首《定風波》，呢兩句意思係即使面對風風雨雨，一樣曠達淡定，明顯城大預咗唔入可能畀人做文章！所以城大表明「城大守正不阿，勇於擔當」。
宣傳片疑盜用Hidden Agenda
大聯盟更未出發先炒車，好似大聯盟fb專頁有一條叫做「香港再出發，加油！」嘅宣傳片，被揭涉嫌盜用咗本地展現空間This Town Needs（TTN）嘅影片，而TTN嘅前身咪就係受盡政府打壓嘅Hidden Agenda（HA）囉！而Hidden Agenda：This Town Needs亦喺佢哋嘅專頁公開鬧爆，「唔講以為咁多年來香港政府對Hidden Agenda嘅打壓係幫咗我哋咁」。最後佢哋喺帖文話「我哋呢啲游牧民族喺你哋政府眼中只係微塵一篤，唔配同你哋再出發。」不過晚上宣傳片已刪去有關片段。
有網民更發現共同發起人有前亞視主播曾子晴，不過佢黑歷史多多，有人質疑佢之前賣「我係香港人」T-shirt，質疑佢賣嗰陣係本土派，𠵱家參加建制派聯盟，食兩家茶禮，呢個大聯盟連自己嘢都咁甩漏，仲旨意佢為香港再出發？
李八方