「其實入住前都幾驚，驚自己『中』咗都唔知！」香港女子佩劍代表林衍蕙，因「密切接觸者」的身份入住火炭駿洋邨，面對四面牆、幾扇窗、一張鐵床、一張枱、一張椅，其間試過鼻塞、肌肉痛，幸虛驚一場，領悟疫情像給予世人extra time（額外時間），看你如何把握。
記者：徐嘉華 攝影：廖雁雄
場地提供：Fencing Hall（劍˙館）
聽過不少強制家居檢疫人士亂向職員要求肥牛及雞肉吃火鍋、有的要6把地拖、20箱火龍果、40罐罐頭，問林衍蕙在駿洋邨可有類似「福利」，她沒好氣地說：「梗係冇，每日送嚟嘅飯盒份量偏少，生果都唔係日日派，都係蘋果同橙，我頭幾日要求過一枝筆，因為想寫日記，亦問過佢哋攞兩粒電視遙控電芯，但要等三個鐘先送到。」
武漢肺炎殺全世界一個措手不及，人心惶惶，全球停擺，體壇亦然，原本正爭取東京奧運入場券的林衍蕙，不但延後的賽期至今毫無消息，更在3月21日被送入駿洋邨隔離，至今仍未回復正常訓練，足足兩個多月沒打劍，是自2009年轉為全職運動員後的首次。
父親曾是邵氏編劇，後來開了Fencing Hall，由代理劍擊用品到現在大兒子兼前香港男佩代表林衍聰（見另文）接手加入劍擊教室。幼女衍蕙是家中掌上明珠，28歲的她一直無往不利，上天偏偏在至關重要的東京奧運這一年，給她一個永世難忘的試煉，帶她去一處接待鑽石公主號返港人士、湖北滯留港人、北角佛堂群組的隔離中心，單單駭人聽聞。
17-18/03 密切接觸者
回到3月17日當天，林衍蕙跟空手道好友曾綺婷（右圖）出外午膳，3月18日體院通知所有從外地返港運動員要自我隔離14天，衍蕙選擇去荃灣一酒店隔離。曾綺婷於20日確診武肺，衍蕙因「密切接觸者」的身份要到駿洋邨隔離，沒想到一連串的「煎熬」從入邨前已開始，她說：「駿洋邨始終係隔離營，聽到要入去嗰陣都幾驚，先係唔知自己會唔會『中招』，然後係等衞生署嚟接我，一日前收到『隨時會接我走』嘅通知，等候嘅過程最難受，有啲似我哋平時等打比賽嗰種心情，但今次等嘅，係唔太想去嘅地方。」
21/03 開始被隔離
衞生署在3月21日，用大巴接衍蕙到駿洋邨後，由民安隊接手進行登記、探熱、派迎新包，當中有齊全梳洗用品、毛巾，推門入屋，第一個感覺是「簡陋」，她說：「真係一眼睇晒，一張鐵架床、一張摺枱、一張凳，一隻碟、一個碗，幾支水，都幾簡陋，而且床褥偏硬、枕頭過細，職員話因為需求過多，要4、5日先換到一個大啲嘅枕頭。」她最滿意是有電視機，認識有住一座的朋友，屋內沒電視，亦感謝家人、朋友帶了較舒適的床褥及枕頭給她：「家人同朋友可以攞嘢畀我，但規定唔可以帶新鮮食材同冷藏食物，有朋友買蛋糕畀我，但攞唔到入嚟。」
23/03 現武肺病徵
由3月17日接觸曾綺婷計起，林衍蕙其實只需住駿洋邨11天就湊足14天隔離的規定，怎料入住第三天出現武漢肺炎的病徵如鼻塞及肌肉痛，她即時被送往威爾斯親王醫院檢測，這又是另一場噩夢，她憶述時說：「入威院又緊張又難受，緊張係唔知自己係咪『中招』，難受係做鼻液檢測，佢哋將棉花棒放入個鼻最入嗰度，好辛苦，有啲似有人將你個頭塞入水裏面，嗰種痛真係好痛，仲要左右兩邊做兩次，痛到標眼水，驗完鼻輪到喉嚨，我已經冇感覺，之後照肺片，當時我血壓偏低，要留院觀察，呢種經驗，一次就夠。」
24/03 檢測呈陰性
幸好所有檢測呈陰性，林衍蕙再被送回駿洋邨繼續餘下的隔離生活，但當晚又出狀況，原本每日三餐的送餐時間十分準時，但從醫院回邨那一晚竟出現「漏單」，打電話追問，只得到「已同你跟進」的回應，最後當晚餓着睡覺，翌日早晨過了八時半的派餐時間，門外的膠椅仍空着，她說：「嗰朝早我聽到門外有人派飯，即時開門同位姐姐講，我未有飯，佢好快答：『你等等，安排緊』，我同佢講噚晚已經冇送飯嚟，佢攞住一袋飯同我講：『唔知邊個單位話唔食，你食呢盒啦』，嗰一刻真係有啲難受，後來入到屋先發現盒飯係全素（右圖），得豆腐同磨菇，我無肉不歡，要加個杯麵先夠。」根據林衍蕙的經驗，入住駿洋邨第一天，要填一張餐單，選好一星期七天的菜式後，第2個星期會重複第1星期的菜單，份量偏小，但肯定沒有像強制家居隔離人士可以要求肥牛的「福利」。
31/03 離開悟人生
3月31日晚健健康康離開駿洋邨，好友曾綺婷亦於4月17日出院，這些經歷令林衍蕙畢生難忘，她坦言有個很深刻的感受，疫情像帶給全世界一次extra time（額外時間），就看你如何把握：「好似我哋女子佩劍，原本只剩1個世界盃同1個奧運資格賽，就完咗奧運爭分，𠵱家個鐘停留喺三月嗰場未比賽嘅比利時世界盃，唔知幾時重啟，一切由零開始，加長咗爭取奧運入場券時間。」
體壇停擺前，林衍蕙世界排名71，是香港女佩排名最高，很大機會爭得奧運亞洲區資格賽代表席位（見另文），她也說志在必得：「2012年倫敦奧運，我以觀眾身份飛去倫敦睇阿哥（林衍聰）比賽，發覺奧運真係有佢與眾不同嘅地方，我希望有一日去到奧運，今屆東奧係我最有把握一次。」衍蕙的信心來自18年亞錦賽第一次奪個人賽銅牌，駿洋邨的經歷亦令她多了時間想想未來：「以前日練夜練，不停出外比賽，冇乜時間可以靜靜諗吓前路，呢刻我最重視嘅一定係爭東奧入場券。」
03年「沙士」，衍蕙讀小學六年級，最後一年參加小學學界劍擊賽，可惜因「沙士」取消，永遠追不回來；17年後的今日，理應是東京奧運年，但因疫情被迫延至明年七月，她說：「感覺同『沙士』嗰次小學學界賽有啲相似，好彩東奧只係延期，我仲有得追。」