全世界主要國家嘅2020年GDP增長率都係負值，美國上星期首次申請失業救濟金人數有三百八十萬，由3月24日起計六個星期內總共有三千零三十萬人申領失業救濟金，估計失業率近20%；極倚賴旅遊業嘅夏威夷，申請失業救濟金人數相等於總就業人數嘅29%。1933年大蕭條期間，失業率高達24.9%，八十七年之後，美國全國失業率會唔會升到破紀錄呢？
歐洲方面當然好唔掂，歐盟首季GDP跌3.8%，主要成員國方面，法國跌5.8%，西班牙跌5.2%，意大利跌4.7%，德國預測全年GDP跌6.3%，已宣佈3月份零售額跌了5.6%，我哋GDP更跌到8.9%，史上最差。
睇數字就觸目驚心。昔日藍籌股Esprit宣佈所有亞洲區零售店（包括香港）關門，集中業務在歐洲，以歐洲現時經濟情況，Esprit可以捱得幾耐？想當年，邢李源賣Esprit股票，一路賣，股價一路升，最高去到2007年133元一股，不少人笑邢李源呢位創辦人係儍仔，今日Esprit（思捷環球0330）股價係幾多？七毫零夠未呀，現在大家知道邢先生係世間天才嘞啩！
唔怪得電腦J、石油K、廠家F等等都同左丁山講，內地不少工廠復工，姿勢多過實際，中央話要復工咪復工囉，工人返到工廠，方知訂單被歐美廠家撤銷咗，根本唔駛開工，可回宿舍休息，但為了有交代，全廠照開冷氣、電燈，以免顯示到零用電，影響李克強經濟指數之用電量！
既然如此，電腦J一向為廠家提供IT維修服務，現在生意大減，幾合乎經濟規律。但今年第一季中國GDP增長跌6.8%，而城鎮失業率不升反跌0.3個百分點，由6.2%跌至5.9%，就係違反經濟常識噃。問電腦J明唔明白中國城鎮失業數字為何如此神奇，佢話：「笑吓咪算囉！」
呢個唔係答案，搵資深中國觀察家M問吓。M先生回答：「主要失業率不升反跌最大原因是疫情高𥧌期全國工廠停工停產，計算的只是停工，不是失業。」但同時又宣佈就業人數增加咗229萬人噃，後來見到地產代理L，佢因兩地抗疫，不能入內地復工，但日日遙控，知道好多工人根本因為種種原因（例如拒絕湖北人或交通阻滯等等）返唔到嚟，代理L間公司要就地聘請臨時工代替，於是做成一方面復工工人不足，一方面有新增僱員嘅情況。代理L估計全國城鎮新增之229萬職位大多數由此而來。第二季又點呢？M先生話暫且信住先，第二季數字要金睛火眼吼實，7月時有八百幾萬畢業生進入勞工市場，中國就業量遇上大考驗，去年講保6（6%增長），今年講六保（保就業係第一保），5月份要開全國兩會，對習近平好有挑戰性。