【本報訊】政府宣佈復課，對一班學生哥而言，「悶到生菇」的三個月終於完結。讀小五的康仔說，停課初期可以不時打機，的確很開心，但「重重複複咁打，打到好悶，電視都睇到厭」，弟弟阿俊則說在家很悶，「都係返學開心啲，好想同同學傾偈」。
父母在職 嘆難督促學習
疫症爆發打破了生活日常，康仔說三個月來甚少出街，頭髮也在家中剪了兩次。現在悶的程度，十分他會給七分，百無聊賴即將結束，他有點期待，「覺得要收拾心情囉，
𠵱家瞓到好晏起身，遲啲返學會識醒」。學校有吩咐功課，不過「冇人限住一日做幾多，會懶散咗」，功課仲差多少？康仔笑着說「差少少啦」，他想快點重返校園，「上鍾意嘅堂，同朋友傾下做過咩」。與同學的交流現僅限手機連線打槍戰，康仔覺得及不上面對面聊天熱鬧。在旁的阿俊則說，與朋友見面時最想問他們的健康。
陳爸爸直言，「復課當然好啦，越快越好，兩個仔悶到生菇」，他與太太都在職，兩名兒子的起居飲食交給家傭，但無人督促他們學習。學校沒有用Zoom教學，「唔上堂齋做功課，結果係唔識做，有時迫啲仔做功課，佢都喊晒口」，惟有半安慰半教訓他們「就係唔識做先至要你做嘛，你識做嘅話仲使乜你做呢？」陳爸爸最擔心小五呈分試如期7月進行，「一個月點追返四個月進度？」如果冬季疫情再爆，「咁點算呀？影響派中學㗎嘛」。
■記者歐陽聯發