由於祖雲達斯已經開始重召球員返意大利準備復操，基斯坦奴朗拿度（C朗）就計劃由家鄉馬德拉島坐私人飛機返都靈向球會報到。不過，佢架私人飛機早前喺西班牙出現阻滯，曾三度被拒絕起飛，好在問題已經搞掂，C朗喺周一已經啟程返都靈，為意甲重啟做準備。
私人飛機三度飛唔起
意大利政府已經批准意甲球隊可以喺5月4日復操，喺遵守社交距離嘅規定下畀球員訓練，祖記都開始叫啲海外兵例如C朗、阿歷士辛度同杜格拉斯哥斯達等返意大利報到。雖然早前有報道指C朗將隊友戴巴拿病毒檢測呈陽性嘅消息流出，令佢可以繼續喺葡萄牙避疫，拒絕歸隊，但其實C朗已經準備好啟程返意大利，只不過行程出現咗少少阻滯。
身處家鄉馬德拉島嘅C朗亦準備坐私人飛機返都靈，點知佢架價值3,400萬歐元嘅飛機就喺西班牙「飛唔起」，據了解，由於當地嘅交通條例限制，飛機曾三次試圖起飛被拒，令C朗只可以喺葡萄牙乾等。不過喺當地時間周一，飛機嘅問題已經完全解決好，亦喺同日飛抵馬德拉島，C朗亦都隨即啟程返都靈，之後先會隔離14日，再重投球會訓練，準備意甲復賽。
Benz做母親節禮物大手筆
C朗除咗做個好員工盡快歸隊外，亦都做個孝順仔，5月3日係西班牙同葡萄牙當地嘅母親節，一向錫媽咪嘅C朗當然有所表示，C朗65歲嘅媽咪Dolores Aveiro就喺ig分享佢收到嘅母親節禮物，相中手持鮮花嘅佢，企喺一架綁咗紅色絲帶嘅黑色Benz SUV隔籬留言話：「多謝我班仔女送畀我嘅禮物，祝所有媽媽母親節快樂！」C朗自己都有出post慶祝母親節，識做嘅佢亦冇冷落女友佐真娜，發佈咗自己分別同阿媽仲有女友嘅合照，仲寫住：「我生命中兩個最特別嘅女士，母親節快樂。」
自三月就返咗馬德拉島避疫嘅C朗，即將要返意大利報到，結束呢個疫情帶嚟嘅短暫假期。上周末C朗就同女友佐真娜同大囝三個人去行山，睇吓馬德拉島嘅動人景色，佢哋似乎都好享受呢次親子活動，上山下海後喺岸邊嘅巨石休息，三個人仲輪住幫大家影相，玩得非常開心！相信C朗都會好珍惜回復足球員生活前，呢段同家人相處嘅寶貴時光。
