久未見面嘅師妹K約左丁山食飯，兩個人吃中餐，好似冇乜好食，除非食西餐，想話訂占美廚房，點知日日「滿座」，要排到五月中後先至可能有枱。占美廚房曾講過在4月結業，點知消息一出，生客熟客紛紛勾起集體回憶，齊齊訂位，於是占美廚房非常好生意，至五月都仍然開門營業，唔知幾時先至真正結業。
既然如此，就去樓上嘅上海總會啦，叫師妹K搵埋同佢好好傾嘅電腦J。
電腦J一見面就呻生意大減，畀好多廠家cut咗服務合約，一間美國有名氣嘅美國財團陷入財困，香港分公司亦通知電腦J，五月開始不需要你的專業服務了。
好彩還有幾個常客吊住條命，電腦J嘆一聲：「2019下半年有咁多示威，我嘅生意仍算不錯，但一個C19肺炎就打殘我啲客戶。你知啦，我係做電腦系統維修及update嘅，人地嘅出口訂單冇得七七八八，削支出係平常事，我咪遭殃囉。」咁又係，連到大人物楊敏德嘅製衣集團都要在內地及境外關閉三間工廠，在越南設廠嘅校友B亦對左丁山講過：「畢業後四十幾年都做紡織呢行，第一次見到咁大危機！」肺炎疫情對環球經濟破壞之大，前所未有。電腦J話：「我地係小人物，死咗冇人知，目前最緊要保命求存。」
保命求存就係（一）保住公司唔執，令二十年來共度時艱嘅夥計有糧出；（二）小心翼翼唔好染上疫病。電腦J嘅家姐係公立醫院醫生，知道近月死亡人數上升，唔係因為C19，而係一般患病嘅八九十歲老人；一位朋友老父因心臟不適，入院檢查，醫生驗過後冇大礙，但因病人年紀大，建議留院觀察一晚。唉吔，就在留院期間，染上其他病菌，就此產生併發症，上了天堂。電腦J嚴肅咁講：「家中年老雙親呢輪不可輕言入醫院，入咗院，現時探病極麻煩，老人家在院乏人照顧（因護士缺人，工作太忙），心理易出狀況！」左丁山聽咗為之一驚，警告自己要stay healthy。
飯後忙去行街街行耐啲當作做運動保健康，又碰到經濟石油專家K，於是問佢中國銀行原油寶會蝕得好慘，以負37元美金平倉（五月美國WTI期油合約），為何如此？石油K話：「不專業之過，內地人買期油，當然係炒賣，香港人炒期油，會通宵不眠睇住電腦直接落盤，內地人就唔可以咁做，要靠內地銀行。」哦，此乃封鎖互聯網，不能翻牆之直接後果，要知道，通訊自由係金融中心之最重要元素也，無通訊自由而偏要在期貨市場炒作，呢次就被狠狠教訓了一課。