阿士東維拉球星基亞利殊攞咗佢上季畀伯明翰球迷襲擊時着過嘅波衫出嚟抽獎，結果幫為英國國民保健服務（NHS）籌咗超過55,000鎊（約53萬港元）。事緣上年三月，作客嘅維拉憑「柏豪」嘅入波險勝主隊伯明翰1:0，但係佢就喺呢場「伯明翰打吡」入波前畀主隊一個球迷襲擊，嗰個兇徒最後被判囚14星期。而基亞利殊為咗支持NHS對抗武漢肺炎疫情，日前就喺ig宣佈將自己喺嗰場比賽着過嘅波衫攞出嚟抽獎，球迷每捐10鎊就有一個中獎機會。基亞利殊喺上周日宣佈抽獎結果︰「我好感謝參加咗抽獎嘅3,615人，你哋嘅捐獻真係不可思議！我們哋總共幫NHS慈善基金籌得55,335鎊。」