【黑鏡線索】
阿女問，點解防武漢肺炎，有啲口罩OK有啲唔OK？因為有啲口罩隔得到病菌，但係隔唔到病毒，病毒係細好多嘅。
病菌同病毒都有個病字，都係肉眼睇唔到，但除此之外完全唔同。所以一定係叫Chinese virus而唔係Chinese bacteria。人同細菌幾唔同都好，至少都係生物。病毒直頭唔算係生物，因為唔識繁殖。
唔舒服睇西醫，有啲醫生會話畀你聽，佢診斷你個病係viral定係bacterial。Bacterial就開抗生素搞掂，viral就等你個免疫系統自己搞掂，不過收得你錢通常都會畀啲藥你，減輕吓症狀咁。
肺炎通常係病菌引起，有報道話，武漢肺炎早期一單個案，就係有個武漢醫院醫生，開抗生素畀個肺炎病人，點知冇反應，咁就知道瀨嘢。
橫向基因傳播 西班牙大流感首見
對上一次全球大瘟疫，係1918年嘅Spanish flu。嗰次當然好多人死於流感，但其實更多人死於secondary infection，由病菌引起嘅肺炎。當年未發明抗生素，用嚟醫嘅，係用嚟自有抗體嘅馬嘅血清。
當時呢個肺炎，都有分四款。有個英國喺政府做嘅醫學研究人員，負責攞病人樣本，睇吓邊啲地區邊款肺炎最多個案，然後調配唔同嘅血清，去唔同嘅區域。當佢做緊研究嘅時候，有驚人發現：A款病菌嘅屍體，竟然可以令隔籬B款病菌轉變成A款。
呢個發現，離奇過小說，後來科學家終於知道，原來有horizontal gene transfer（HGT）呢回事。大家不嬲以為，基因只係由父母向子女咁垂直傳播，而唯一嘅基因創新途徑係mutation，點知原來基因竟然可以跨物種橫向傳播，仲要係經常發生，有興趣嘅朋友，《A Tangled Tree》一書有精采講解。
八、九十年代，研究人員發現，微生物基因圖譜裏面，有啲頭尾鏡像嘅重複段落，簡稱CRISPR，而CRISPR係可以減少HGT出現，同時可以記底感染過嘅病毒，防止再次感染，如同微生物界嘅免疫系統。
輸出生化危機 唔係今次就下次
CRISPR好多人聽過，係因為到咗2012年，研究人員成功repurpose咗CRISPR用嚟做gene editing，可以輕鬆將啲基因copy ＆ paste，例如2018年嗰單，中国研究人員修改一對孖女嘅基因，就係用CRISPR。武肺之前，早已經有好多人警告過，中国對CRISPR嘅使用監管太鬆，而政府又好有可能有化武計劃，向全球輸出生化危機係遲早嘅事。
CRISPR不單止可以做gene editing，仲可以用嚟搜尋基因，有幾間biotech startup正係同時間競賽，喺主流嘅武肺快速測試方法以外，開闢另一條路，用CRISPR基礎做快速測試，去scale up測試。喺大規模生產疫苗之前，能夠大規模做快速測試，係令人類過返稍為正常日子嘅希望。
中国輸出生化危機，唔係今次就係下次，一場瘟疫，令世界覺醒，中国問題，係全人類問題，根本冇得獨善其身，你唔搞佢，佢都會嚟搞你，一日唔光復，一日大家都唔會好過。
撰文：宋漢生
fb : sunghsblog