從1986年劉德華拍《肝膽相照》時開始認識他，感覺上華仔是工作好勤奮、認真和執着，對私隱極度保護的人。他很有義氣，曾對他有恩的人拍膊頭想請拍戲，明知收很少片酬，他都沒有拒絕！同是巨星級，華仔相對地肯做善事，話說90年代，麥潔文找我幫忙，指某間老人院欠一筆經費，後來我問向華勝有沒有電影可以做慈善首映，幫這間老人院籌款，向生就好爽快答應幫忙：「我攞《龍過雞年》幫老人院籌款啦！我公司包一半飛，其餘一半你哋自己去搵人賣啦！定價1,000蚊一張。」結果我與幾位記者行家幫麥潔文搵了發哥、張敏、邱淑貞、關之琳、梅艷芳與黎明等，推銷餘下500張慈善首映戲票。
當中華仔是最豪爽一個，他共買了50張，但他只取了6張給家人睇戲，其餘戲票他再捐出來義賣；後來賣剩8張戲票時，我剛巧在一個片場見到黎明，本來是問他能否買4張慈善戲票？結果他反問：「賣剩幾多？不如我買晒啦！」結果幫我買晒。
主動跟上車
華仔在演藝圈多年，特別重視個人形象，緋聞極少，但其實四大天王於90年代當打時期，不少女星都對華仔好感興趣，記得90年代就在片場聽過一位梳頭阿姐爆料，她們天天與明星們混在一起工作，知道的秘密最多，聽她講起華仔一些八卦，也是讚他定力夠：「華仔同某某女星有晚拍完戲收工，華仔一向係自己揸車走，嗰位女星自己有保母車接送，嗰晚女星一見華仔上咗車，就跳咗上華仔部車度，仲坐喺司機隔鄰個位，當時我哋望到華仔個樣係好愕然同無奈！其實喺現場都feel到個女嘅對男嘅有意思啦！我哋咪睇到華仔焗住車女星返屋企囉！」
可能大家會問，女星咁主動出擊，之後會唔會有下文呢？因為這位紅女星有樣有身材，又夠主動，難怪影圈中「吃」過不少俊男，成為圈中出名的集郵專家，經常在收工後以壞車、司機有事請假為由，要求男對手送她回家，然後在車上主動勾搭一下對方，如果有反應就自然有下文啦！如果不受她這套，就各自返歸。聽梳頭阿姐講：「我試探過個女嘅，佢話華仔對佢真係冇乜興趣，話嗰晚送完佢返屋企就雞咁腳走，之後睇到華仔對佢係避忌咗！反而佢同期拍另一部戲嘅對手就畀佢集郵成功，嗰個都係好紅㗎，但受唔住引誘啦！所以橋唔怕舊，最緊要受。」
印象中香港影星就只有華仔要求電影合約訂明要擁有最後剪接權，我聽好多導演說過好反感演員要這權力，因為他們覺得演員只會偏重自己部份，不是以一部片的整體利益出發。兩年多前一個飯局中，我曾經問過華仔：「其實你點解咁堅持要有最後剪接權，咁做可能會令你少咗機會同一啲好導演合作？」華仔回答：「你有冇睇《寒戰》呀！《寒戰》咪用咗我剪個版本上映，你覺得有冇問題呀！我一定係為部戲出發去剪，其實我合約訂明有呢個權利，唔代表我一定用，只係一種保障。」認不認同華仔應該擁有最後剪接權都好，但不可否認他對香港電影是有心人，肯定有作出貢獻。
撰文：白露眉
本欄逢周一刊出
【非常人．非常事】
縱橫娛樂圈35年的資深記者，看盡圈中人情冷暖；這年頭，地球病了，娛樂圈轉慢了，白露眉是時候出手了，分享「非常人．非常事」，跟「蘋民」圍爐取暖。