在武肺的陰霾下，生病成了大多數人的恐懼， 但瑜伽冠軍級人馬魏秋琪就將童年時呼吸不順的怪病，轉化成強身健體的動力，以瑜伽戰勝病魔與心魔。作為媽媽、瑜伽店老闆娘的她面對這段非常時期，內心堅強，由外到內也發放着正能量。
魏秋琪曾於2013年稱霸國際瑜伽錦標賽，原來她是個早產嬰兒，自小體弱多病，曾是急症室常客，30多歲的她說：「我七至八個月大就出世，肺部已經完全發展成熟，但我潛意識入面仲未解決，覺得呼吸唔到。」看不到的「氧氣」變成了她的舒適圈，由細到大每年也要入醫院：「我出世後人生頭一個月就喺氧氣箱入面，我覺得唞唔到氣時，第一步就係叫救護車，上車後第一樣畀我嘅就係氧氣罩，我對氧氣同嗰個膠嘅氣味有似層相識嘅感覺。」還表示小時候認為去醫院是一種解放，現在很怕再去，亦因為這段經歷令她變得堅強。
享受與子隔離
在香港出世、加拿大溫哥華長大的魏秋琪，曾在台灣擔任室內設計師，怪病直至大學畢業也沒有中斷，但沒想到原來是心病作怪。她說：「有一日喺office趕稿突然唞唔到氣，嗰次好嚴重，去到醫院第一次有醫生同我講可能係關心理事，兩個星期後我就pack好晒行李返加拿大，走去讀心理學，希望可以自醫。」並在離開台灣前初嘗人生第一次瑜伽堂：「當時聽人講瑜伽對呼吸好，所以我覺得就要做啲嘢，之後返到加拿大先真正開始探索瑜伽。」這個轉捩點改變了她的人生，她指學習瑜伽十多年，其間再沒有再看醫生和吃西藥：「瑜伽幫我強壯咗身體，增咗磅。」
訪問日期曾三度更改，原因是魏秋琪愛子心切。3月初疫情越趨嚴峻，她急着接回在峇里旅行的囝囝Osiris返港，然後陪他進行14日家居隔離，她坦言享受其中：「我哋除咗打機，仲傾多咗偈。不過件事好情緒化，我記得佢第一日home learning，我覺得佢唔尊重我，又唔理我 ，兩個就坐喺到喊，之然就慢慢揣摩到點去幫佢。」
網上直播授課
提到愉景灣開設的瑜伽中心，魏秋琪指生意也受到疫情打擊，但有失亦有得：「已經冇開一個月，但我有信心之後會好轉，因為大家都需要做好多self-care。」由於無法正常營業，她開始網上直播授課：「呢個形式吸引咗更多喺市區住嘅人跟我哋上堂， 甚至有英國、美國同印度嘅客人 ，所以好開心。」有七成客人是外國人，魏秋琪指他們的抗疫方式不及港人謹慎：「我哋喺愉景灣會同外國人盡量解釋呢個唔係信仰問題，你去到人哋屋企就要尊重，所以一定要戴口罩！」
撰文：黃嘉琪
攝影：周樂恒
場地提供：Yoga Up
更多精采時尚內容，盡在 http://add.appledaily.com。