有心的作品,便有知音人,當活在平行時空的歌手還在演唱情情塔塔的失戀情歌時,還有一小撮歌者唱出社會發生的荒謬事,讓每天起床覺得很難過的手足,聽到後得到鼓舞、紓解或共鳴。晴天林原來自去年反送中開始,至今已二創超過50首歌,問為何會走上二創之路?Sunny說:「其實上年6月開始係先做咗《香港之歌》,簡單將打氣廣東歌混合做一首歌整出嚟,出嚟反應幾好,有人聽到覺得首歌治癒心靈,我先發覺原來音樂可以喺整個運動中做到呢嗰作用,之後二創咗《連儂牆》算係個開端,當時成個社會都係講梗政治運動,嗰陣你冇乜心情做其他歌,再講樂壇都絕少呢類歌曲,就算有歌手都未必敢唱,所以覺得可以創作多啲。」
問Sunny平均用多少時間改編一首作品,他說:「唔定㗎喎!有時一個鐘內搞掂,有時要諗幾日都唔出奇。靈感不過係日常發生嘅事,嗰排多事發生就多靈感,譬如我睇到一單新聞想寫,就會開始搵吓有乜嘢歌啱,寫完後第日就返studio錄歌,錄兩至三個鐘、然後MV拍一兩個鐘、剪片兩至三個鐘,成個過程最快一至兩日完成。」
向舊作致敬 延廣東歌生命
提到二創,有人覺得純粹惡搞抽水,亦有人定義為以輕鬆方法包裝嚴肅議題,Sunny也有自己看法:「我覺得二次創作絕對有存在價值,其實某程度上係向舊有作品致敬,我之前有首作品叫《武漢傾情》,有好多千禧後中、小學生,直情唔知黎明有唱歌,乜原來呢位叔叔係歌手嚟?然後inbox同我講聽咗你嘅《武漢傾情》後,先知黎明有一首《夏日傾情》咁好聽嘅歌,甚至因此聽返好多黎明嘅舊歌,呢個係一種可以令廣東歌延續落去嘅辦法,你知近年好多後生仔只聽韓國同日本歌,二次創作就變成一個好好嘅渠道,繼續去推廣廣東歌。」
對於改編《陪著你走》成諷刺特首推行禁酒令的《全面禁酒》被YouTube下架,Sunny說:「我都係第一次遇到呢種情況,成首歌被刪咗,可能有啲人未必知,喺YouTube做二次創作,因為唱緊人哋首歌,啲片就冇廣告收入,我大部份歌都係咁樣,但直接下架真係第一次,可能因為無綫近年成日翻唱呢首歌,最近又改成防疫歌,我之後上載咗個朗誦版,算係無聲抗議,因為我覺得逼我下架,都係幾小器嘅行為。」
問到會否堅持唱下去?Sunny說:「咁就要睇香港有冇嘢唱,如果冇嘢唱梗係好,即係代表大家都好安穩、平安,但只要呢個政府繼續咁荒謬,政權一路打壓人民,一路都有題材唱落去!如果講到有乜嘢新發展,可能就真係搵多啲網友合作,或者MV上唔好再咁低成本。」他直言憂慮廿三條立法:「如果真係立咗法,首首歌下架,或者有條罪拉我都唔出奇,都會驚,都擔心創作自由會收窄,如果係內地唱呢啲歌,應該已經死咗。」
採訪:牢卉
場地提供:音樂窩Music Home
晴天林
二創音樂人晴天林由中學起一直酷愛唱歌與創作,參加過各式歌唱比賽惜鎩羽而歸,愛於YouTube分享音樂作品的他去年辭掉全職專心造音樂,二創出多首反送中歌曲大受歡迎,加上武漢肺炎,令他投放更多時間創作,晴天林除身體力行撐黃店外又幫黃店作歌,YouTube連同fb專頁有近10萬粉絲,近日更搞直播遙距跟fans「和你唱」!