今日係五四運動101年紀念，仲有乜好講？五四運動之最大遺產恐怕係（一）白話文驅逐了文言文，愈來愈少中國學生研究／愛好古文，完全趨向西化；（二）共產黨思想萌芽，讓李大釗、陳獨秀有機會宣揚共產思想，後來在1921年成立共產黨，改變了中國幾千年歷史。除此之外，還有甚麼影響？當年大講賽先生（科學）、德先生（民主），至今還是得個講字，德先生已在中國大陸徹底消除，共產黨獨霸，賽先生則在共產黨嚴密監管下有發展，但研究禁區處處有，不懂政治嘅科學家一定冇運行，五四運動也講愛國，但去年習近平紀念五四運動100年時講過，「當代中國，愛國主義的本質就是堅持愛國和愛黨，愛社會主義高度統一。新時代中國青年要聽黨話，跟黨走……」
聽黨話，跟黨走就說明了一切，本港中學有通識教育，根本就係犯忌。講通識，教中學生如何思維，明辨是非，膽敢從不同角度看事物，簡直是造反！董建華做特首時推動通識課程，交李國章及羅范椒芬負責，當年應董特首邀請，捐款資助通識教育發展嘅有錢人，後來被愛國報紙點名，好似犯了株連罪，真是冤枉。現時董建華、梁振英合組「再出發大聯盟」，出來見記者嘅係另一位老人家譚耀宗，年青人一睇就翻眼，梁振英仲話大聯盟要扶助香港年輕人㖭，佢三位對伍淑清聲稱要放棄嘅年輕人，有幾大吸引力呢，負責青年工作嘅43歲民政事務局局長徐英偉是否會調查吓？
不跟黨走，不聽黨話而去教通識教育、常識、或中國歷史，在今日香港，已成危險行為，有好多藍絲家長似乎有特別任務，負責篤灰，專門搜集中小學老師課堂上言論及測驗題，凡發現似乎違反黨的指引嘅，就向愛國群組及報紙發佈，向教育局及學校施壓，最新例子係可立小學，教師因問題寫得唔夠縝密，就畀人上綱上線，要學校發聲明道歉。據藍絲群組4月29日廣傳，可立小學隨即道歉，該校有老師將第一次鴉片戰爭起因說成「英國以禁煙為理由派兵攻打中國」，於是大罵教師篡改歷史，其實該教師如果小心啲，在「禁煙」之前加多「中國」兩個字，變成「英國以中國禁煙為理由派兵攻打中國」，就點會有錯呀。藍絲家長為通識老師，歷史老師講書不合乎黨的話而發動投訴的事件，左丁山屢有所聞，校長不勝其擾，除咗奉勸老師留意藍絲家長「監學」之外（即是教書不能暢所欲言，慢慢會為了息事寧人，自動噤聲），亦要大力關注教育局審查新教科書時，開始向黨史傾斜，以聽黨話為本嘅歷史，滲入本港教科書。